പാലക്കാട്:  വിദേശത്ത് ഹെഡോഫീസുള്ള കോഴ്‌സിന്റെ പരീക്ഷാഉത്തരകടലാസുകള്‍ യാത്രയ്ക്കിടെ നഷ്ടപ്പെട്ടതായി പരാതി. ഫുഡ് സേഫ്റ്റിയുമായി ബന്ധപ്പെട്ടുള്ള ഹസാര്‍ഡ് അനാലിസിസ് ആന്‍ഡ് ക്രിട്ടിക്കിള്‍ കണ്‍ട്രോള്‍ പോയിന്റ് (എച്ച്.എ.സി.സി.പി) എന്ന കോഴ്‌സിന്റെ പരീക്ഷയുടെ ചോദ്യോത്തര കടലാസുകളാണ് ഇന്നലെ നഷ്ടപ്പെട്ടത്. ഇതുമായി ബന്ധപ്പെട്ട് എച്ച്.എ. സി.സി.പി കേരളാഘടകം അധികൃതര്‍ പാലക്കാട് ടൗണ്‍ സൗത്ത് പൊലിസില്‍ പരാതി നല്‍കി.
കോയമ്പത്തൂരില 34 വിദ്യാര്‍ഥികളുടെ ഉത്തരകടലാസുകളാണ് ഇന്നലെ ബസ് മാര്‍ഗം പാലക്കാട്ടെത്തിച്ചത്. തുടര്‍ന്ന് വിദേശത്തേക്ക് പോവാനിരിക്കുകയായിരുന്ന പൂര്‍വവിദ്യാര്‍ഥി അഫ്‌സല്‍ വശം കൊടുത്തുവിട്ടു. യുവാവ് ഇതുമായി വീട്ടിലേക്കു ബൈക്കില്‍ പോകുന്നതിനിടെയാണ് ജില്ലാ ആശുപത്രിയ്ക്കു സമീപം കെട്ട് താഴെ വീണുപോയത്. പിന്നീട് അന്വേഷിച്ചെങ്കിലും കണ്ടെത്താനായില്ല. തുടര്‍ന്ന് പൊലിസില്‍ പരാതി നല്‍കി.  യു.കെയിലാണ് കോഴ്‌സിന്റെ സെന്റര്‍.
ഫുഡ് സേഫ്റ്റിയുമായി ബന്ധപ്പെട്ട് ഏറെ തൊഴിലവസരങ്ങള്‍ സൃഷ്ടിക്കുന്ന കോഴ്‌സുമാണിത്. പരീക്ഷാപേപ്പറുകളുടെ മൂല്യനിര്‍ണയം യു.കെയിലെ ഹെഡോഫീസിലാണ് നടത്തപ്പെടുക. ഉത്തരകടലാസുകളുടെ കെട്ട് കണ്ടുകിട്ടുന്നവര്‍ സൗത്ത് സ്റ്റേഷനിലോ താഴെ പറയുന്ന നമ്പറുകളിലോ അറിയിക്കണമെന്ന് അധികൃതര്‍ അറിയിച്ചു. നമ്പര്‍: 9061096221, 9846742351, 9745494646, 9526401663.