റിയാദ്: സഊദിയില്‍ മദ്യപാനത്തിനിടെ മലയാളികള്‍ തമ്മിലുണ്ടായ തര്‍ക്കത്തിനിടെ ഒരാള്‍ കുത്തേറ്റു മരിച്ചു. കിഴക്കന്‍ പ്രവിശ്യാ നഗരിയായ ദമാമിനടുത്ത് അല്‍ഖോബാര്‍ റാക്കയിലാണ് സംഭവം. വിഴിഞ്ഞം സ്വദേശി സന്തോഷ് പീറ്റര്‍ (32) ആണ് കൊല്ലപ്പെട്ടത്. സ്വകാര്യ കോണ്‍ട്രാക്ടിങ് കമ്പനിയിലെ ജോലിക്കാരനായിരുന്നു. ഇന്നലെ വൈകിട്ട് ഏഴിന് ജോലി കഴിഞ്ഞതിനുശേഷം താമസ സ്ഥലത്ത് സുഹൃത്തുക്കള്‍ക്കൊപ്പം മദ്യപിക്കുന്നതിടെ വാക്കേറ്റമുണ്ടാകുകയും കൊല്ലം സ്വദേശിയായ സക്കീര്‍ കത്തിയെടുത്തു കുത്തുകയുമായിരുന്നു. സംഭവത്തില്‍ സന്തോഷ് തല്‍ക്ഷണം മരിച്ചു. കൂടെയുണ്ടായിരുന്ന മലയാളിയായ ജിജോക്കും പരുക്കേറ്റിട്ടുണ്ട്. ഇദ്ദേഹത്തെ അടുത്തുള്ള ആശുപത്രിയില്‍ എത്തിച്ചു. ജിജോ അപകടനില തരണം ചെയ്തിട്ടുണ്ട്. അല്‍ കോബാര്‍ പൊലിസ് കേസെടുത്തു. പ്രതിക്കായി പൊലിസ് തിരച്ചില്‍ ആരംഭിച്ചിട്ടുണ്ട്.