സുല്‍ത്താന്‍ ബത്തേരി: മതിയായ രേഖകളില്ലാതെ കര്‍ണാടകയില്‍ നിന്നു സംസ്ഥാനത്തേക്ക് കടത്തിയ 26 ലക്ഷം രൂപ സുല്‍ത്താന്‍ ബത്തേരി പൊലിസ് പിടികൂടി. ബത്തേരി അറബികോളജ് റോഡില്‍ രാജേശ്വരി നിവാസില്‍ വിജയ് കൃഷ്ണദേവ് സാവന്ത്(31), ലവേഷ് രാം ചന്ദ്ര(29), മഹാരാഷ്ട്ര സോലാപൂര്‍ സംഹോളമഹദ് വീട്ടില്‍ രാജു(32) എന്നിവരെ പൊലിസ് അറസ്റ്റ് ചെയ്തു.
ബുധനാഴ്ച രാവിലെ സംസ്ഥാന അതിര്‍ത്തിയായ മുത്തങ്ങ പൊന്‍കുഴിയില്‍ വാഹന പരിശോധനയ്ക്കിടെയാണ് സംഘം പിടിയിലായത്. ഇവരുടെ കാറിലെ പ്രത്യേകം തയാറാക്കിയ രഹസ്യ അറയ്ക്കുള്ളിലായിരുന്നു പണം. 2000 രൂപയുടെ 800 നോട്ടുകളും 500 ന്റെ രണ്ടായിരം നോട്ടുകളുമാണ് കണ്ടെത്തിയത്.
വാഹനത്തിന്റെ ഉള്‍വശം രൂപമാറ്റം വരുത്തിയതില്‍ സംശയം തോന്നിയതിനെ തുടര്‍ന്ന് നടത്തിയ വിശദ പരിശോധനയിലാണ് പണം കണ്ടെടുത്തത്. കര്‍ണാടകയില്‍ സ്വര്‍ണം വിറ്റുകിട്ടിയ പണമാണെന്നാണ് പിടിയിലായവര്‍ പൊലിസിനോട് പറഞ്ഞത്.