ജെനോവ: യുവന്റസിന്റെ അപരാജിത കുതിപ്പിന് വിരാമം. സീരി എയില്‍ ഇന്നലെ നടന്ന മത്സരത്തില്‍ ജെനോവയോട് പരാജയപ്പെട്ടതോടെയായിരുന്നു യുവന്റസിന്റെ അപരാജിത കുതിപ്പിന് വിരാമമായത്. ജെനോവയോട് എതിരില്ലാത്ത രണ്ട് ഗോളിനായിരുന്നു യുവന്റസിന്റെ തോല്‍വി. അത്‌ലറ്റികോ മാഡ്രിഡുമായി നടന്ന ചാംപ്യന്‍സ് ലീഗ് മത്സരത്തിനിടെ പരുക്കേറ്റ ക്രിസ്റ്റ്യാനോ ഇല്ലാത്തതും യുവന്റസിന് തിരിച്ചടിയായി.

ലീഗിലെ 27 മത്സരത്തിലും യുവന്റസ് തോല്‍വി അറിഞ്ഞിരുന്നില്ല. 24 വിജയവും മൂന്ന് സമനിലയുമായിരുന്നു യുവന്റസിന്റെ സമ്പാധ്യം. പരാജയപ്പെട്ടെങ്കിലും ര@ണ്ടാം സ്ഥാനക്കാരായ നാപോളിയുമായി 17 പോയിന്റിന് മുന്നില്‍ നില്‍ക്കുന്ന യുവന്റസിന് കിരീട പോരാട്ടത്തില്‍ വെല്ലുവിളികളുണ്ടാവില്ല.
ലീഗില്‍ പതിനൊന്നാം സ്ഥാനക്കാരായ ജെനോവ കാര്യമായ വെല്ലുവിളി ആകാന്‍ സാധ്യതയില്ല എന്ന കണക്ക് കൂട്ടലില്‍ സൂപ്പര്‍ താരം റൊണാള്‍ഡോക്ക് വിശ്രമം അനുവദിച്ച അല്ലഗ്രിയുടെ തീരുമാനം പിഴച്ചു എന്നത് മത്സരത്തിന്റെ തുടക്കം മുതല്‍ പ്രകടമായിരുന്നു.