പഴയങ്ങാടി: വെങ്ങര ചെമ്പല്ലിക്കുണ്ട് ഭാഗത്ത് നിന്ന് ഏഴിമല നാവിക അക്കാദമിയിലേക്ക് കുടിവെള്ളമെത്തിക്കുന്ന ടാങ്കര്‍ ലോറിക്ക് നേരെ ആക്രമണം. ടാങ്കറിന്റെ മുന്‍വശത്തെ ചില്ലുകള്‍ കല്ലേറില്‍ തകര്‍ന്നു. ചില്ലുകള്‍ ദേഹത്ത് തെറിച്ച് ഡ്രൈവര്‍ വെങ്ങര സ്വദേശി അരുഡിയന്‍ ഷൈബു(37)വിന് പരുക്കേറ്റു. ഇയാളെ പയ്യന്നൂര്‍ താലൂക്ക് ആശുപത്രിയില്‍ പ്രവേശിപ്പിച്ചു.
ഇന്നലെ പുലര്‍ച്ചെ രണ്ടോടെയാണ് മൂന്ന് ബൈക്കുകളിലായി വന്ന ഏഴംഗ സംഘം അക്രമം നടത്തിയത്. ആക്രമണ സമയത്തു ലോറിയില്‍ കിടക്കുകയായിരുന്നു ഡ്രൈവര്‍. എറണാകുളത്തെ സ്വകാര്യ കമ്പനിയുടേതാണ് വാഹനം. സംഭവസ്ഥലം പഴയങ്ങാടി പൊലിസ് സന്ദര്‍ശിച്ചു. ലോറി പൊലിസ് സ്റ്റേഷനിലേക്കു മാറ്റി. പ്രതികളുടെ സി.സി.ടി.വി ദൃശ്യം പൊലിസ് പരിശോധിച്ചു.