കണ്ണൂര്‍: അമേത്തിയില്‍ രാഷ്ട്രീയ സ്ഥിതിനോക്കി ബി.ജെ.പിയെ തോല്‍പ്പിക്കാന്‍ സാധിക്കുന്നവര്‍ക്കു വോട്ട് സി.പി.എം നല്‍കുമെന്നു പോളിറ്റ്ബ്യൂറോ അംഗം എസ്. രാമചന്ദ്രന്‍ പിള്ള.

അമേത്തിയിലെ തെരഞ്ഞെടുപ്പ് ചിത്രം പൂര്‍ണമായി പുറത്തുവന്നാല്‍ മാത്രമേ ഇക്കാര്യത്തില്‍ തീരുമാനമെടുക്കാന്‍ കഴിയൂ. ബി.ജെ.പി വിരുദ്ധ വോട്ടുകളെ മുഴുവന്‍ സംസ്ഥാനത്തും യോജിപ്പിക്കാനുള്ള ശ്രമമാണ് ഇടതുപക്ഷം നടത്തുന്നത്.
എന്നാല്‍ കോണ്‍ഗ്രസ് ഇക്കാര്യത്തില്‍ നേര്‍വിപരീത സമീപനമാണ് എടുക്കുന്നതെന്ന് കണ്ണൂര്‍ പ്രസ് ക്ലബിന്റെ മുഖാമുഖം പരിപാടിയില്‍ അദ്ദേഹം പറഞ്ഞു. രാജ്യത്താകെ ഉയര്‍ന്നുവരുന്ന മതനിരപേക്ഷ ഐക്യത്തെ അട്ടിമറിക്കുന്ന കോണ്‍ഗ്രസ് അധ്യക്ഷന്‍ രാഹുല്‍ഗാന്ധി വയനാട്ടില്‍ പരാജയപ്പെടും.
അമേത്തിയില്‍ തോല്‍വി ഭയന്നാണ് രാഹുല്‍ വയനാട്ടിലെത്തിയത്. പടക്കളത്തില്‍ നിന്ന് ഓടിയൊളിച്ചയാള്‍ക്ക് എങ്ങനെ പടനായകനാവാന്‍ കഴിയും? മതനിരപേക്ഷ ശക്തികളുടെ കൂട്ടായ്മയെയാണ് കോണ്‍ഗ്രസ് മുഖ്യശത്രുവായി കാണുന്നത്. ബി.ജെ.പിക്ക് എട്ട് ശതമാനം മാത്രം വോട്ടുള്ള വയനാട്ടില്‍ മത്സരിക്കാനെത്തിയ രാഹുലും ഈ സന്ദേശമാണു നല്‍കുന്നതെന്നും അദ്ദേഹം പറഞ്ഞു.