ന്യൂഡല്‍ഹി: കേരളത്തിലെ വിവാദ വിഷയങ്ങള്‍ ചര്‍ച്ച ചെയ്യുന്നതില്‍ സി.പി.എമ്മിനുള്ളില്‍ ഭിന്നതയെന്ന വാര്‍ത്തകളെ തള്ളി സി.പി.എം ജനറല്‍ സെക്രട്ടറി സീതാറാം യെച്ചൂരി. പാര്‍ട്ടിയ്ക്ക് എന്നും ഒറ്റ അഭിപ്രായം മാത്രമാണെന്നും ഭിന്നതയില്ലെന്നും യെച്ചൂരി പ്രതികരിച്ചു.

ഡിപ്ലോമാറ്റിക് ബാഗ് വഴി സ്വര്‍ണ കടത്തു പിടികൂടിയതിന് പിന്നാലെ ഏത് തരത്തിലുള്ള അന്വേഷണവും നടത്താന്‍ കേന്ദ്ര സര്‍ക്കാരിനോട് ആവശ്യപെട്ടിരുന്നു. അത് പ്രകാരം എന്‍.ഐ.എ അന്വേഷണം നടക്കുന്നു. കേന്ദ്ര കമ്മിറ്റിയില്‍ ചര്‍ച്ച ചെയുന്ന കാര്യത്തില്‍ ഭിന്നത ഇല്ല. സി.പി.എമ്മിന് എന്നും ഒറ്റ അഭിപ്രായം മാത്രം. സര്‍ക്കാരിന്റെ ദൈനംദിന കാര്യങ്ങളില്‍ പാര്‍ട്ടി ഇടപെടാറില്ലെന്നും അദ്ദേഹം പറഞ്ഞു.

കേരളത്തിലെ സംഭവ വികാസങ്ങളില്‍ റിപ്പോര്‍ട്ട് തേടിയെന്ന വാര്‍ത്തകളും യെച്ചൂരി തള്ളി കളഞ്ഞു.

സ്വര്‍ണക്കടത്ത് കേസില്‍ മുഖ്യമന്ത്രിയുടെ ഓഫീസിനുള്ള ബന്ധം ആരോപിച്ച് പ്രതിപക്ഷ നേതാവ് രമേശ് ചെന്നിത്തല അയച്ച കത്ത് കിട്ടി. കത്തിന് ഉടന്‍ മറുപടി നല്‍കുമെന്നും യെച്ചൂരി അറിയിച്ചു.