ഈറ്റ: ഉത്തര്‍പ്രദേശില്‍ മിനിട്രക്ക് അപകടത്തില്‍പ്പെട്ട് 14 പേര്‍ മരിച്ചു. സംഭവത്തില്‍ 25 പേര്‍ക്ക് പരുക്കേറ്റു. പടിഞ്ഞാറന്‍ ഉത്തര്‍പ്രദേശിലെ ഈറ്റ ജില്ലയിലാണ് സംഭവം. അര്‍ധരാത്രിയാണ് അപകടം സംഭവിച്ചത്.

സംഘം സക്രോളിയില്‍ നിന്ന് കല്യാണ ആഘോഷം കഴിഞ്ഞ വരുന്ന വഴിയാണ് അപകടം സംഭവിച്ചത്. ഡ്രൈവര്‍ ഉറങ്ങിയതാണ് അപകടത്തിന് കാരണമായത്. ഉറക്കംമൂലം വാഹനത്തിന്റെ നിയന്ത്രണം നഷ്ടമാവുകയും വാഹനം പാലത്തിന്റെ മുകളില്‍ നിന്നും താഴേക്ക് വീഴുകയുമായിരുന്നുവെന്ന് അധികൃതര്‍ അറിയിച്ചു. നാട്ടുകാരാണ് രക്ഷാപ്രവര്‍ത്തനം നടത്തിയത്. പരുക്കേറ്റവരെ ആഗ്ര മെഡിക്കല്‍കോളജില്‍ പ്രവേശിപ്പിച്ചു. ഇവരില്‍ ചിലരുടെ പരുക്ക് ഗുരുതരമാണെന്ന് അധികൃതര്‍ അറിയിച്ചു. സംഭവത്തെ കുറിച്ച് അന്വേഷണത്തിന് ഉത്തരവിട്ടിട്ടുണ്ടെന്ന് ഈറ്റ ജില്ലാ മജിസ്‌ട്രേറ്റ് അമിത് കിഷോര്‍ പറഞ്ഞു.