ആലപ്പുഴ: പ്രളയബാധിത പ്രദേശങ്ങള്‍ സന്ദര്‍ശിക്കുന്നതിനായി കോണ്‍ഗ്രസ് ദേശീയ അധ്യക്ഷന്‍ രാഹുല്‍ ഗാന്ധി ഇന്ന് ജില്ലയിലെത്തും. രാവിലെ 10.30 ന് രാഹുല്‍ ഗാന്ധി ഹെലികോപ്റ്ററില്‍ ചെങ്ങന്നൂര്‍ ക്രിസ്ത്യന്‍ കോളജ് ഗ്രൗണ്ടില്‍ വന്നിറങ്ങും. ഇവിടെ പ്രളയബാധിത പ്രദേശമായ ഇടനാട് സന്ദര്‍ശിക്കും.
ദുരിതബാധിതരോടൊപ്പം ചെലവഴിച്ചശേഷം അവിടെ നിന്നും 12 ന് ആലപ്പുഴ റിക്രിയേഷന്‍ ഗ്രൗണ്ടില്‍ വന്നിറങ്ങി ഇവിടെനിന്നും നേരേ പാതിരപ്പള്ളി ക്യാമിലോട്ട് കണ്‍വെന്‍ഷന്‍ സെന്ററില്‍ മത്സ്യത്തൊഴിലാളികളെ ആദരിക്കുന്ന ചടങ്ങില്‍ പങ്കെടുക്കുവാനെത്തും.
മഴക്കെടുതിയില്‍ വീട് നഷ്ടപ്പെട്ടവര്‍ക്ക് കെ.പി.സി.സി നിര്‍മ്മിച്ചു നല്‍കുന്ന ആയിരം വീടുകളില്‍ ഇരുപത് വീടുകള്‍ നിര്‍മ്മിക്കുന്നതിനുള്ള തുക ചടങ്ങില്‍ രാഹുല്‍ ഗാന്ധിക്ക് കൈമാറും. മഹിളാ കോണ്‍ഗ്രസിന്റെ ദുരിതാശ്വാസ പദ്ധതികളുടെ തുടര്‍ പരിപാടിയായ മിഷന്‍ നവകേരളയുടെ ഉദ്ഘാടനം രാഹുല്‍ഗാന്ധി നിര്‍വ്വഹിക്കും.
കെ.പി.സി.സി നിര്‍മ്മിച്ച് നല്‍കുന്ന വീടുകള്‍ക്കുള്ള സംഭാവനയായി അഞ്ചു ലക്ഷം രൂപ കൈമാറും.
ഈ ചടങ്ങിന് ശേഷം രാഹുല്‍ഗാന്ധി ദുരിതാശ്വാസ ക്യാംപായ ആലപ്പുഴ ലീയോതേര്‍ട്ടീന്ത് ഹയര്‍ സെക്കന്ററി സ്‌കൂളിലെ പ്രളയ ബാധിതരെ സന്ദര്‍ശിക്കും.