തൃക്കരിപ്പൂര്‍: തൃക്കരിപ്പൂര്‍ താലൂക്ക് ആശുപത്രിയില്‍ ഉച്ചകഴിഞ്ഞ് ഡോക്ടര്‍മാരില്ലാത്തത് രോഗികള്‍ക്കു ദുരിതമാകുന്നു. പനി ബാധിച്ചും മറ്റും അവശനിലയിലായവര്‍ പ്രയാസപ്പെട്ട് ആശുപത്രിയിലെത്തുമ്പോഴാണ് പലപ്പോഴും ഡോക്ടറില്ലെന്ന വിവരം അറിയുന്നത്.
കാലവര്‍ഷമായതിനാല്‍ വിവിധയിനം പനികളും മറ്റു രോഗങ്ങളും പടര്‍ന്നു പിടിക്കുന്ന അവസരത്തിലാണ് നിര്‍ധനരുടെ അത്താണിയായി പ്രവര്‍ത്തിക്കേണ്ട സര്‍ക്കാര്‍ ആശുപതി വൈകുന്നേരങ്ങളില്‍ നോക്കുകുത്തിയായി മാറുന്നത്. ഡോക്ടറെ കാണണമെങ്കില്‍ ഒരു മണിക്ക് മുന്‍പേ എത്തണമെന്നാണ് ജീവനക്കാര്‍ പറയുന്നതെന്നും രോഗികള്‍ പറയുന്നു.
തൃക്കരിപ്പൂര്‍, വലിയപറമ്പ, പടന്ന, പിലിക്കോട്, ചെറുവത്തൂര്‍ എന്നീ പഞ്ചായത്തുകളിലെ നിര്‍ധനരായ രോഗികളുടെ ആശ്രയമാണ് തൃക്കരിപ്പൂര്‍ താലൂക്ക് അശുപത്രി. സാമൂഹ്യാരോഗ്യ കേന്ദ്രമായിരുന്ന  ആശുപത്രിയെ താലൂക്ക് ആശുപത്രിയാക്കി ഉയര്‍ത്തിയിട്ട് വര്‍ഷം അഞ്ചു കഴിഞ്ഞുവെങ്കിലും വൈകിട്ട് വരുന്ന രോഗികളെ പരിശോധിക്കാന്‍ ഡോക്ടര്‍മാരില്ലാത്ത അവസ്ഥയാണുള്ളത്.
കഴിഞ്ഞ ദിവസം ആശുപത്രിയുടെ പരിസരത്തു നിന്നു ബൈക്കില്‍ നിന്നു വീണു പരുക്കേറ്റ ഒരാളെ ആശുപത്രിയില്‍ എത്തിച്ചെങ്കിലും ഡോക്ടറില്ലാത്തതിനാല്‍ പ്രാഥമിക കാര്യങ്ങള്‍ ചെയ്തുകൊടുക്കാന്‍ പോലും ജീവനക്കാര്‍ തയാറായിരുന്നില്ല.
നാട്ടുകാരും പരിസരത്തെ ഓട്ടോഡ്രൈവര്‍മാരും ഇടപെട്ടതിനെ തുടര്‍ന്നാണ് പ്രാഥമിക കാര്യങ്ങള്‍ ചെയ്തുവിട്ടത്. രാവിലെ മുതല്‍ നൂറുകണക്കിന് രോഗികളാണ് താലൂക്ക് ആശുപത്രിയിലെത്തുന്നത്. എന്നാല്‍ ആവശ്യത്തിന് ഡോക്ടര്‍മാര്‍ പോലും പല ദിവസങ്ങളിലും ഉണ്ടാകാറില്ല.
വ്യാഴാഴ്ച ദിവസങ്ങളില്‍ മുതിര്‍ന്ന പൗരന്മാരുടെ ബി.പിയും മറ്റും പരിശോധിക്കുന്ന ദിവസമായതിനാല്‍ ഇതിന് നിയോഗിക്കുന്ന ഡോക്ടര്‍മാര്‍ മുതിര്‍ന്ന പൗരന്‍മാരുടെ തന്നെ മറ്റു രോഗങ്ങള്‍ നോക്കാറില്ലെന്നും ആരോപണമുണ്ട്.