ടെ

പൊന്നാനി: പൊന്നാനി തീരദേശത്തെ ഏറെ പിന്നാക്കം നില്‍ക്കുന്ന സ്‌കൂളിന് ഇന്ന് അഭിമാനത്തിന്റെ നിമിഷമാണ്. പൊന്നാനി എം.ഇ.എസ് സ്‌കൂള്‍ പൊന്നാനി കടപ്പുറത്തിനടുത്ത് സ്ഥാപിച്ചിട്ട് 16 വര്‍ഷങ്ങള്‍ കഴിഞ്ഞു. 100 ശതമാനം വിജയം എന്നത് സ്‌കൂളിന്റെ ഒരു സ്വപ്നമായിരുന്നു.
 അതോടൊപ്പം മുഴുവന്‍  വിഷയത്തിലും എ പ്ലസ് നേടുന്ന ഒരു കുട്ടിയെങ്കിലും ഉണ്ടാവുക എന്നതും . ഇപ്പോഴിതാ പതിനാറ്  വര്‍ഷത്തെ കാത്തിരിപ്പിനൊടുവില്‍ പൊന്നാനി എം.ഇ.എസി ലെ ഒരു പെണ്‍കുട്ടി ആ നേട്ടം  കൈവരിച്ചിരിക്കുന്നു. പൊന്നാനി സ്വദേശി ജസീല കെയാണ് എല്ലാ വിഷയങ്ങള്‍ക്കും എ പ്ലസ് നേടിയത്. മുന്‍ വര്‍ഷങ്ങളിലൊക്കെ ഈ  സ്‌കൂളില്‍ പഠിക്കുന്ന വിദ്യാര്‍ഥികള്‍ക്ക് പരമാവധി ഏഴ് എ പ്ലസ് വരെ മാത്രമാണ് ലഭിച്ചിരുന്നത് .ഇത്തവണ  പത്തില്‍ പത്തുമായി ജസീല കെ സ്‌കൂളിന്റെ സ്വപ്നം സാക്ഷാല്‍കരിച്ചുകൊടുത്തു.തീരദേശത്തെ  സാധാരണക്കാരുടെ കുട്ടികള്‍ മാത്രം പഠിക്കുന്ന ഈ സ്‌കൂള്‍ പത്താം ക്ലാസ് പരീക്ഷാ ഫലത്തില്‍ പൊന്നാനി നഗരസഭയിലെ മറ്റു സ്‌കൂളുകളെയൊക്കെ മറി കടന്ന് രണ്ടാം സ്ഥാനം നേടുകയും ചെയ്തു. പൊന്നാനി നഗരസഭയില്‍ പെട്ട മറ്റു പ്രധാനപ്പെട്ട സ്‌കൂളുകളെ പിന്നിലാക്കി 96.4 ശതമാനം  വിജയമാണ് ഇത്തവണ നേടിയത്. ചരിത്രനേട്ടം കൈവരിച്ച ജസീലയെ ആദരിക്കാനുള്ള ഒരുക്കത്തിലാണ് പ്രധാനാധ്യാപിക ഷീബയും സഹപ്രവര്‍ത്തകരും.