ന്യൂഡല്‍ഹി: ഗാന്ധി ഘാതകനായ നാഥുറാം ഗോഡ്‌സെയെ സ്തുതിച്ച ബി.ജെ.പി ഭോപ്പാല്‍ സ്ഥാനാര്‍ഥി പ്രഗ്യാ സിങ് ഠാക്കൂറിനെ പുറത്താക്കണമെന്ന് എന്‍.ഡി.എ മുന്നണിയിലെ കക്ഷിയും ബിഹാര്‍ മുഖ്യമന്ത്രിയുമായ നിതീഷ് കുമാര്‍.

ഗോഡ്‌സെയെ രാജ്യസ്‌നേഹിയെന്ന് വിളിച്ച പ്രഗ്യയുടെ നടപടിയുമായി യോജിക്കാനാവില്ലെന്ന് നിതീഷ് കുമാര്‍ പറഞ്ഞു. ഇത്തരം പരാമര്‍ശങ്ങളുമായി തനിക്കും തന്റെ പാര്‍ട്ടിയായ ജെ.ഡി.യുവിനും പൊരുത്തപ്പെടാന്‍ സാധിക്കില്ലെന്നും നിതീഷ് കുമാര്‍ തുറന്നടിച്ചു. ഗാന്ധിജി രാജ്യത്തിന്റെ പിതാവാണ്. ഗോഡ്‌സെയെ കുറിച്ച് ഇങ്ങനെയൊരു പരാമര്‍ശം നടത്തുന്നത് ജനങ്ങള്‍ക്ക് ഇഷ്ടമല്ലെന്നും വോട്ട് രേഖപ്പെടുത്തിയ ശേഷം നിതീഷ് കുമാര്‍ മാധ്യമങ്ങളോട് പറഞ്ഞു.

ഗോഡ്‌സെ ദേശഭക്തനാണെന്നും ഇനിയും ദേശഭക്തനായി തന്നെ അറിയപ്പെടുമെന്നും പ്രഗ്യ സിങ് ഠാക്കൂര്‍ പറഞ്ഞിരുന്നു. ഗോഡ്‌സെയെ തീവ്രവാദി എന്ന് വിളിക്കുന്നവര്‍ ആദ്യം ആത്മപരിശോധ നടത്തണം. ഗോഡ്‌സെയെ തീവ്രവാദി എന്ന് വിളിക്കുന്നവര്‍ക്ക് തിരഞ്ഞെടുപ്പില്‍ അതിനുതക്ക മറുപടി ലഭിക്കുമെന്നും പ്രഗ്യാ സിങ് കൂട്ടിച്ചേര്‍ത്തു. സ്വതന്ത്ര ഇന്ത്യയിലെ ആദ്യ ഹിന്ദു തീവ്രവാദി ഗോഡ്‌സെയാണെന്ന കമല്‍ഹാസന്റെ പരാമര്‍ശത്തിന് മറുപടി നല്‍കുകയായിരുന്നു പ്രഗ്യാ സിങ്.