ന്യൂഡല്‍ഹി: താപനില ഉയര്‍ന്ന സാഹചര്യത്തില്‍ ഡല്‍ഹിയില്‍ റെഡ് അലര്‍ട്ട് പ്രഖ്യാപിച്ച് കേന്ദ്ര കാലാവസ്ഥാ നിരീക്ഷണ കേന്ദ്രം. 46.8 ഡിഗ്രിയാണ് നിലവില്‍ പ്രദേശത്തെ താപനില.

സാധാരണഗതിയില്‍ താപനില 45 ഡിഗ്രി തൊടുമ്പോഴാണ് ഉഷ്ണതരംഗം പ്രഖ്യാപിക്കുന്നത്. താപനില 47 ഡിഗ്രിയാകുമ്പോഴാണ് അതിതീവ്ര ഉഷ്ണതരംഗം എന്ന് പറയുന്നത്. എന്നാല്‍ ഡല്‍ഹി പോലുള്ള ചെറിയ പ്രദേശങ്ങളില്‍ താപനില 45 ഡിഗ്രിയാകുമ്പോള്‍ തന്നെ ഉഷ്ണ തരംഗം പ്രഖ്യാപിക്കും.

കലാവസ്ഥാ നിരീക്ഷണ കേന്ദ്രത്തിന്റെ റിപ്പോര്‍ട്ട് പ്രകാരം ചൊവ്വാഴ്ച്ചവരെ ഇത് നീണ്ടുനില്‍ക്കും. ജൂണ്‍ പകുതിയാകുന്നതുവരെ വടക്കേ ഇന്ത്യയില്‍ കാലവര്‍ഷം എത്തില്ലെന്നും കേന്ദ്രം അറിയിച്ചു.

ചൂട് ഏറ്റവും അനുഭവപ്പെടുന്ന ഉച്ച സമയങ്ങളില്‍ കഴിവതും വീടിനോ ഓഫീസിനോ പുറത്തിറങ്ങരുതെന്നും പൊതുജനങ്ങളോട് നിര്‍ദേശമുണ്ട്.