കുറ്റിക്കോല്‍ (കാസര്‍കോട്): നാലര വയസുകാരിയെ പീഡിപ്പിച്ചയാളെ പൊലിസ് അറസ്റ്റു ചെയ്തു. ബന്തടുക്ക പടുപ്പിലെ ക്വാര്‍ട്ടേഴ്‌സിലെ താമസക്കാരനായ രവീന്ദ്രനെ(45) യാണ് കാസര്‍കോട് എസ്.എം.എസ് ഡിവൈ.എസ്.പി ഹരീഷ് ചന്ദ്രനായ്ക്കും സംഘവും അറസ്റ്റു ചെയ്തത്. ഇയാള്‍ ബന്തടുക്ക ബിവറേജസ് കോര്‍പറേഷനിലെ രാത്രി കാവല്‍ക്കാരനാണ്.
രണ്ടു ദിവസം മുന്‍പ് അയല്‍വാസിയായ കുട്ടിയെ ഇയാള്‍ തന്റെ താമസസ്ഥലത്തേക്ക് കൊണ്ടുപോയി പീഡിപ്പിക്കുകയായിരുന്നുവെന്ന് പൊലിസ് പറഞ്ഞു.
വീട്ടിലെത്തിയ കുട്ടി അസ്വസ്ഥത പ്രകടിപ്പിച്ചതിനെത്തുടര്‍ന്നു ഡോക്ടറെ കാണിച്ചപ്പോഴാണ് പീഡനത്തിനിരയായ വിവരം വ്യക്തമായത്. തുടര്‍ന്നു കുട്ടിയുടെ മാതാവിന്റെ പരാതിയെ തുടര്‍ന്നാണു രവീന്ദ്രനെ അറസ്റ്റു ചെയ്തത്.
ബലാത്സംഗം, പോക്‌സോ, പട്ടികജാതി പട്ടികവര്‍ഗത്തില്‍പ്പെട്ടവര്‍ക്കെതിരേയുള്ള അതിക്രമം തടയല്‍ നിയമം എന്നീവകുപ്പുകള്‍ പ്രകാരമാണ് ഇയാള്‍ക്കെതിരേ കേസെടുത്തത്. കാസര്‍കോട് അഡീഷനല്‍ ജില്ലാ സെഷന്‍സ് കോടതി ഒന്നില്‍ ഹാജരാക്കിയ പ്രതിയെ റിമാന്‍ഡ് ചെയ്തു.