അങ്കമാലി: വേതന വര്‍ധന ആവശ്യപ്പെട്ട് ബസ് ജീവനക്കാരുടെ അനിശ്ചിചകാല പണിമുടക്കില്‍ നിന്ന് പിന്‍മാറാന്‍ യൂനിയനുകള്‍ തയാറാകണമെന്ന് പ്രൈവറ്റ് ബസ് ഉടമ സംഘം ഭാരവാഹികളായ എ.പി. ജിബി, ബി.ഒ. ഡേവീസ്, കെ.സി വിക്ടര്‍, പി.ആര്‍ അപ്പു എന്നിവര്‍ ആവശ്യപ്പെട്ടു.
2014 മെയ് മാസം ബസ് ചാര്‍ജ് വര്‍ധിപ്പിച്ചതിന് ശേഷം ജീവനക്കാരുടെ വേതനം വര്‍ധിപ്പിച്ച് കരാര്‍ പുതുക്കുകയുണ്ടായി. എന്നാല്‍ തുടര്‍ന്ന് ഡീസല്‍ വിലയിലും ഇന്‍ഷുറന്‍സ് പ്രീമിയത്തിലും സ്‌പെയര്‍ പാര്‍ട്‌സ്, ടയര്‍, റോഡ് ടാക്‌സ്, വിവിധയിനം ഫീസുകള്‍, ഫൈന്‍, തുടങ്ങി ബസ് സര്‍വീസുമായി ബന്ധപ്പെട്ട സമസ്ഥമേഖലയിലും വിലവര്‍ധന ബസ് വ്യവസായത്തെ തകര്‍ത്തു കൊണ്ടിരിക്കയാണ്.
800 മുതല്‍ 1000 പേര്‍ വരെ യാത്രചെയ്തിരുന്ന സ്ഥാനത്ത് ഇപ്പോള്‍ 600 മുതല്‍ 700 വരെ യാത്രക്കാര്‍ മാത്രമാണ് യാത്ര ചെയ്യുന്നത്. മേഖലയില്‍ സര്‍വീസ് നടത്തുന്ന 250 ബസുകളില്‍ ഭൂരിഭാഗവും ഹ്രസ്വദൂര ഷട്ടില്‍ സര്‍വീസുകളാണ്. 180 കിലോമീറ്റര്‍ വരെ മാത്രമാണ് പ്രതിദിനം ഓടുന്നത്. സംസ്ഥാനത്തെ മറ്റു മേഖലകളില്‍ 300 കി.മി മുതല്‍ 350 കി.മി വരെയാണിത്. അങ്കമാലി കാലടി ടൗണുകളില്‍ അനുഭവപ്പെടുന്ന ഗതാഗത കുരുക്കു മൂലം തുടര്‍ച്ചായായ് ട്രിപ്പുകള്‍ റദ്ദാക്കേണ്ടി വരുന്നതും ബസുകളുടെ വരുമാനത്തെ സാരമായി ബാധിക്കുന്നുവെന്ന് ഉടമകള്‍ പറഞ്ഞു.
ന്യായമായ വേതന വര്‍ദ്ധന നല്‍കാന്‍ തയ്യാറാണെങ്കിലും മൂന്ന് തൊഴിലാളികള്‍ക്ക് കൂടി പ്രതിനിധം 850 രൂപ അധികം നല്‍കണമെന്ന് യൂനിയനുകളുടെ പിടിവാശിയാണ് സമരത്തിന് കാരണം. അധ്യയന വര്‍ഷം ആരംഭിക്കുന്നതും കാലവര്‍ഷം തുടങ്ങന്നതും കണക്കിലെടുത്ത് സമരത്തില്‍ നിന്ന് പിന്‍മാറാന്‍ ബന്ധപ്പെട്ടവര്‍ തയ്യാറാകാന്‍ അസോസിയേഷന്‍ ആവശ്യപ്പെട്ടു.