കൊച്ചി: ദേവസ്വം മന്ത്രി കടകംപള്ളി സുരേന്ദ്രന്റെ ഭാര്യ കൊവിഡ് മാനദണ്ഡങ്ങള്‍ ലംഘിച്ച് ഗുരുവായൂര്‍ ക്ഷേത്രദര്‍ശനം നടത്തിയ സംഭവത്തില്‍ ഹൈക്കോടതിയില്‍ ഹരജി. കേസെടുക്കണമെന്ന് ആവശ്യപ്പെട്ട് സമര്‍പ്പിച്ച ഹരജിയില്‍ കോടതി റിപ്പോര്‍ട്ട് തേടി.

ഭക്തര്‍ക്ക് പ്രവേശന വിലക്ക് നിലനില്‍ക്കേ നാലമ്പലത്തിനുള്ളില്‍ പ്രവേശിച്ചതെന്നാണ് ഹരജിക്കാരന്‍ പറയുന്നത്. നവംബര്‍ 26നായിരുന്നു മന്ത്രിയുടെ ഭാര്യയും കുടുംബവും വിലക്ക് മറികടന്ന് ക്ഷേത്രത്തില്‍ പ്രവേശിച്ചത്. കഴകക്കാര്‍ക്കും കീഴ്ശാന്തിമാര്‍ക്കും പ്രവര്‍ത്തി സമയങ്ങളിലൊഴിച്ച് പ്രവേശന വിലക്കുള്ളപ്പോഴായിരുന്നു ഇത്.

കൊവിഡ് മാനദണ്ഡങ്ങളുടെ ലംഘനമാണ് ഇതെന്നാണ് ഹര്‍ജിക്കാരന്റെ ആരോപണം. ബി.ജെ.പി നേതാവ് നാഗേഷ് ആണ് കോടതിയെ സമീപിച്ചത്. പൊലിസിനെ സമീപിച്ചെങ്കിലും കേസ് എടുത്തില്ലെന്നും അതിനാലാണ് ഹൈക്കോടതിയെ സമീപിച്ചതെന്നും ഹരജിക്കാരന്‍ വ്യക്തമാക്കി.