തിരുവനന്തപുരം: ജയിലില്‍ കഴിയുന്ന അബ്ദുല്‍നാസര്‍ മഅ്ദനിയുടെ മോചനത്തിനായി മുഖ്യമന്ത്രി ഇടപെടണമെന്നു സി.ദിവാകരന്‍ എം.എല്‍.എ. അബ്ദുല്‍നാസര്‍ മഅ്ദനിയുടെ ജീവന്‍ രക്ഷിക്കാന്‍ സര്‍ക്കാര്‍ അടിയന്തരമായി ഇടപെടണമെന്നാവശ്യപ്പെട്ട് പി.ഡി.പി നടത്തിയ സെക്രട്ടേറിയറ്റ് ധര്‍ണ ഉദ്ഘാടനം ചെയ്യുകയായിരുന്നു അദേഹം.
ഇതിനായി എം.എല്‍.എമാരും സംഘടനാ നേതാക്കളും ഒപ്പിട്ട നിവേദനം മുഖ്യമന്ത്രിക്ക് നല്‍കും. എന്ത് കുറ്റത്തിനാണെന്ന് അറിയാതെയാണ് മഅ്ദനി വര്‍ഷങ്ങളായി ജയിലില്‍ കഴിയുന്നത്. വിചാരണ നടത്താതെ തടവിലിട്ടിരിക്കുകയാണ്. ഇത് മനുഷ്യാവകാശ ലംഘനമാണ്. ഇല്ലാത്ത കുറ്റം തലയില്‍ ചാര്‍ത്തി പലരെയും ജയിലില്‍ ഇട്ടിട്ടുണ്ട്. അത് പോലെയാണ് മഅ്ദനിയുടെയും കാര്യം. തനിക്ക് രാഷ്ട്രീയ ശക്തിയായി നിന്ന ആളാണ് അദ്ദേഹം. ഒന്നുകില്‍ മഅ്ദനി ചെയ്ത കുറ്റമെന്തെന്നു വ്യക്തമാക്കണം. അല്ലെങ്കില്‍ അദേഹത്തെ പുറത്തുവിടണം. കുറ്റപത്രം പോലും നല്‍കാതെ ഒരാളെ തടങ്കലില്‍ പാര്‍പ്പിച്ചിരിക്കുന്നത് എന്ത് നിയമമാണെന്നു മനസിലാകുന്നില്ലെന്നും ദിവാകരന്‍ പറഞ്ഞു.
നീലലോഹിതദാസന്‍ നാടാര്‍, കൊടിക്കുന്നില്‍ സുരേഷ് എം.പി, ഭാസുരേന്ദ്ര ബാബു, പാളയം ഇമാം പി.പി സുഹൈബ് മൗലവി, പാച്ചല്ലൂര്‍ അബ്ദുള്‍സലിം മൗലവി, കെ.സജീദ്, ജലീല്‍ നീലാംബ്ര, ഹസന്‍ മൗലവി, നിസാര്‍ മൗലവി സംസാരിച്ചു. പി.ഡി.പി വൈസ് ചെയര്‍മാന്‍ പൂന്തുറ സിറാജ് അധ്യക്ഷത വഹിച്ചു. പി.ഡി.പി നേതാക്കളായ വര്‍ക്കല രാജ്, മാഹീന്‍ ബാദുഷ മൗലവി, വി.എം. അലിയാര്‍, അഡ്വ. കഞ്ഞിരമറ്റം സിറാജ് തുടങ്ങിയവര്‍ പങ്കെടുത്തു.