മലയിന്‍കീഴ്:  പെണ്‍കുട്ടികളെ ശല്യംചെയ്യുന്നതു പറഞ്ഞുവിലക്കിയതിന്റെ വൈരാഗ്യത്തില്‍ വീട്ടമ്മയെ ആക്രമിച്ച രണ്ടുപേര്‍ പിടിയില്‍. വിളവൂര്‍ക്കല്‍ കുരിശുമുട്ടം കാര്‍ത്തിക നിവാസില്‍ അരുണ്‍ (21), മങ്കാട്ടുകടവ് അണ്ണൂര്‍ അറക്കപുര വീട്ടില്‍ രാഹുല്‍ (23) എന്നിവരെയാണു മലയിന്‍കീഴ് പൊലിസ് അറസ്റ്റ് ചെയ്തത്. കഴിഞ്ഞ ശനിയാഴ്ച രാവിലെയാണു വിളവൂര്‍ക്കല്‍ കുരിശുമുട്ടം സ്വദേശിയായ വീട്ടമ്മയെ പ്രതികള്‍ വീട്ടില്‍ക്കയറി ആക്രമിച്ചത്. ദേഹോപദ്രവമേല്‍പ്പിക്കുകയും വസ്ത്രം വലിച്ചുകീറിയതായും പരാതിയില്‍ പറയുന്നു. സംഭവത്തിനു ദിവസങ്ങള്‍ക്കു മുന്‍പു പ്രതികള്‍ പെണ്‍കുട്ടികളെ റോഡില്‍വച്ചു ശല്യം ചെയ്യുന്നതിനെ വീട്ടമ്മ ചോദ്യംചെയ്യുകയും പറഞ്ഞുവിലക്കുകയും ചെയ്തിരുന്നു. ഇതാണ് ആക്രമണത്തിനു പിന്നിലെന്നു പൊലിസ് പറഞ്ഞു. പ്രതികളെ കോടതിയില്‍ ഹാജരാക്കി.