കൊല്ലം: നെഹ്‌റുവിന്റെ കൈയൊപ്പുപതിഞ്ഞ നെഹ്‌റു ട്രോഫിയുമായുള്ള വിളംബരജാഥക്കു ആലപ്പുഴയില്‍ പ്രൗഢഗംഭീരമായ തുടക്കം.
64ാമത് നെഹ്‌റു ട്രോഫി വള്ളംകളിയുടെ പ്രചാരണാര്‍ഥം ഇന്‍ഫര്‍മേഷന്‍പബ്ലിക് റിലേഷന്‍സ് വകുപ്പും നെഹ്‌റു ട്രോഫി പബ്ലിസിറ്റി കമ്മിറ്റിയും ചേര്‍ന്ന് സംഘടിപ്പിക്കുന്ന വിളംബര ജാഥയുടെ ഫ്‌ളാഗ് ഓഫ് ആലപ്പുഴ ഇ.എം.എസ്. സ്റ്റേഡിയത്തില്‍ ജില്ലാ പൊലിസ് മേധാവി എ അക്ബര്‍  നിര്‍വഹിച്ചു.
ജലോത്സവത്തിന്റെ ചരിത്രം രേഖപ്പെടുത്തിയ ഫോട്ടോ വീഡിയോ പ്രദര്‍ശനം, നാടകാചാര്യന്‍ കാവാലം നാരായണപ്പണിക്കര്‍ രചിച്ച ഉണര്‍ത്തുപാട്ട്, നെഹ്‌റു ട്രോഫി ഡോക്യുമെന്ററി പ്രദര്‍ശനം എന്നിവ പരിപാടിയുടെ സവിശേഷതകളാണ്. വിവിധ കാലങ്ങളിലെ നെഹ്‌റു ട്രോഫി ജലമേളയുടെ 75 ഓളം ഫോട്ടോകള്‍ വിളംബര ജാഥയുടെ പ്രദര്‍ശനത്തില്‍ ഉള്‍പ്പെടുത്തിയിട്ടുണ്ട്.
ഇന്ന് കരുനാഗപ്പള്ളി, ചവറ, കൊല്ലം കലക്ടറേറ്റ്, പത്തനംതിട്ട, ചെങ്ങന്നൂര്‍ എന്നിവിടങ്ങളില്‍ ജാഥ പര്യടനം നടത്തും. കൊല്ലം കലക്ടറേറ്റില്‍ രാവിലെ 11 ന് ജില്ലാ ഇന്‍ഫര്‍മേഷന്‍ ഓഫീസിന്റെയും പ്രസ് ക്ലബിന്റെയും നേതൃത്വത്തില്‍ സ്വീകരണം നല്‍കും. വൈകിട്ട് നാലിന് പത്തനംതിട്ട ടൗണില്‍ ജില്ലാ ഇന്‍ഫര്‍മേഷന്‍ ഓഫീസിന്റെയും പ്രസ് ക്ലബിന്റെയും നേതൃത്വത്തില്‍ സ്വീകരണം നല്‍കും. രണ്ടാം ദിവസത്തെ പര്യടനം   ചെങ്ങന്നൂര്‍ കെ.എസ്.ആര്‍.ടി.സി ബസ് സ്റ്റാന്‍ഡില്‍ സമാപിക്കും.
നാളെ രാവിലെ ഒമ്പതിന് തിരുവല്ലയില്‍ നിന്ന് പര്യടനം ആരംഭിക്കും. ചങ്ങനാശ്ശേരി കെ.എസ്.ആര്‍.ടി.സി ബസ് സ്റ്റാന്‍ഡ്, ചിങ്ങവനം, കോട്ടയം പ്രസ്‌ക്ലബ്, കലക്ടറേറ്റ്, തിരുനക്കര, താഴത്തങ്ങാടി എന്നിവിടങ്ങളില്‍ പര്യടനം നടത്തും. 2.30ന് കലക്ടറേറ്റില്‍ പര്യടനം നടത്തും. 13ന് അരൂര്‍, ചേര്‍ത്തല, തണ്ണീര്‍മുക്കം, കലവൂര്‍ എന്നിവിടങ്ങളില്‍ പര്യടനം നടത്തുന്ന ജാഥ ആലപ്പുഴയില്‍ സമാപിക്കും.