നെടുമങ്ങാട്: ബോണക്കാട് കുരിശുമലയിലെ നെറുകയില്‍ പ്രധാന കുരിശുള്‍പ്പെടെ 2 കുരിശുകളും അള്‍ത്താരയും തകര്‍ത്ത സംഭവത്തില്‍ കുറ്റക്കാര്‍ക്കെതിരേ നടപടിയെടുക്കുമെന്നു മുഖ്യമന്ത്രി. വനം വകുപ്പിലുള്ളവര്‍ കുരിശ് തകര്‍ക്കാനുള്ള സാഹചര്യം ഇല്ലെന്നും കുരിശു തകര്‍ത്തത് രാത്രിയുടെ മറവിലായതിനാല്‍ സാമൂഹികവിരുദ്ധരാകും സംഭവത്തിനു പിന്നിലെന്നുമാണ് കരുതുന്നതെന്നു മുഖ്യമന്ത്രി പറഞ്ഞു. ഇന്നലെ വൈകുന്നേരം മുഖ്യമന്ത്രിയുടെ വസതിയില്‍ നെയ്യാറ്റിന്‍കര രൂപതാ നേതൃത്വവുമായി നടത്തിയ ചര്‍ച്ചയില്‍ സംസാരിക്കുകയായിരുന്നു മുഖ്യമന്ത്രി.
കുരിശു തകര്‍ത്ത സംഭവത്തില്‍ അന്വേഷണം നടത്തുമെന്നും മുഖ്യമന്ത്രി സഭാ നേതൃത്വത്തിന് ഉറപ്പു നല്‍കി. കുരിശ് പുനസ്ഥാപിക്കുന്നതിന് വനം വകുപ്പുമായി ചര്‍ച്ച നടത്തിയശേഷം തീരുമാനമെടുക്കുമെന്നും മുഖ്യമന്ത്രി അറിയിച്ചു. കുരിശു പുനസ്ഥാപിക്കുക, കുരിശ് തകര്‍ത്തവര്‍ക്കെതിരേ ശക്തമായ നടപടിയെടുക്കുക, ആരാധനാ സ്വാതന്ത്ര്യം നല്‍കുക, വൈദികര്‍ക്കും വിശ്വാസികള്‍ക്കുമെതിരേ വനംവകുപ്പ് എടുത്തിരിക്കുന്ന കേസുകള്‍ പിന്‍വലിക്കുക, ഭാവിയില്‍ വിശ്വാസികള്‍ക്ക് തീര്‍ഥാടനം നടത്താനുള്ള സ്വാതന്ത്ര്യം നല്‍കുക തുടങ്ങി അഞ്ച് ആവശ്യങ്ങളാണ് നിവേദനത്തിലൂടെ സഭാനേതൃത്വം മുഖ്യമന്ത്രിയെ അറിയിച്ചത്.
നെയ്യാറ്റിന്‍കര രൂപതാ വികാരി ജനറല്‍ ജി. ക്രിസ്തുദാസ്, കെ.എസ് ശബരിനാഥന്‍ എം.എല്‍.എ, ഫാ. ഷാജ്കുമാര്‍, കെ.എല്‍.സി.എ നെയ്യാറ്റിന്‍കര രൂപതാ പ്രസിഡന്റ് അഡ്വ. രാജു, കെ.എല്‍.സി.എ തിരുവനന്തപുരം അതിരൂപതാ പ്രസിഡന്റ് ആന്റണി, കെ.എല്‍.സി.ഡബ്ല്യു.എ സംസ്ഥാന ജനറല്‍ സെക്രട്ടറി അല്‍ഫോണ്‍സാ അല്‍റ്റിസ് എന്നിവര്‍ പങ്കെടുത്തു.