തിരുവനന്തപുരം: ബാലാവകാശ കമ്മിഷന്‍ അംഗ നിയമനത്തില്‍ ഹൈക്കോടതി വിമര്‍ശനം കേള്‍ക്കേണ്ടി വന്ന ആരോഗ്യമന്ത്രി കെ.കെ ശൈലജ രാജിവെക്കണമെന്നാവശ്യപ്പെട്ട് പ്രതിപക്ഷ എം.എല്‍.എമാര്‍ നിയമസഭാ കവാടത്തില്‍ അനിശ്ചിതകാല സത്യഗ്രഹം തുടങ്ങി. ഷാഫി പറമ്പില്‍, റോജി എം. ജോണ്‍, ടി.വി ഇബ്രാഹിം, വി.പി സജീന്ദ്രന്‍, എ.എന്‍ ശംസുദ്ദീന്‍ എന്നിവരാണ് സമരം തുടങ്ങിയത്.

കെ.കെ ശൈലജ മെഡിക്കല്‍ ബില്ല് സഭയില്‍ അവതരിപ്പിക്കുന്നതില്‍ ശക്തമായ പ്രതിഷേധമാണ് പ്രതിപക്ഷത്തു നിന്നും ഉണ്ടായത്. മന്ത്രിയ്ക്ക് അധികാരത്തില്‍ തുടരാന്‍ അര്‍ഹതയില്ലെന്നും രാജിവെക്കണമെന്നും പ്രതിപക്ഷ നേതാവ് രമേശ് ചെന്നിത്തല ആവശ്യപ്പെട്ടു. ഇതിനിടെ മെഡിക്കല്‍ ബില്ലിന്റെ പകര്‍പ്പുകള്‍ കീറിയെറിഞ്ഞ പ്രതിപക്ഷം സഭാനടപടികള്‍ ബഹിഷ്‌കരിക്കുകയും ചെയ്തു.