നാദാപുരം: ആശുപത്രി കേന്ദ്രീകരിച്ചു മോഷണം പതിവാക്കിയ യുവാവിനെ പൊലിസ് അറസ്റ്റ് ചെയ്തു. വടയം നടുപ്പൊയില്‍ സ്വദേശി സുര്‍ജിത്തിനെ (29)ആണ് നാദാപുരം പൊലിസ് അറസ്റ്റ് ചെയ്തത്.
തിരക്കുള്ള സമയത്ത് ആശുപത്രിയിലെ വരിയില്‍ കുട്ടികളുമായി കാത്തു നില്‍ക്കുന്നവരില്‍ നിന്ന് ആഭരണങ്ങള്‍ തട്ടിയെടുക്കലാണ് ഇയാളുടെ രീതി.
കഴിഞ്ഞ ദിവസം നാദാപുരം താലൂക്ക് ആശുപത്രിയില്‍ അമ്മയോടോത്ത് വരിയില്‍ നില്‍ക്കുകയായിരുന്ന കുട്ടിയുടെ പാദസരം പൊട്ടിച്ചെടുക്കാനുള്ള ശ്രമത്തിനിടെയാണ് ഇയാള്‍ പിടിയിലാകുന്നത്. കുട്ടിയുടെ അസാധാരണ ഭാവം കണ്ട് പരിശോധിക്കുന്നതിനിടെ പാദസരം നഷ്ടപ്പെട്ടത് ശ്രദ്ധയില്‍പ്പെടുകയായിരുന്നു.
ഇതേ തുടര്‍ന്ന് യുവതി ബഹളം വെക്കുന്നതിനിടയില്‍ നിലത്തുവീണ പാദസരം കൈക്കലാക്കാന്‍ ശ്രമിച്ച യുവാവിനെ ആളുകള്‍ പിടികൂടി ചോദ്യം ചെയ്തു. ഇയാളുടെ പെരുമാറ്റത്തില്‍ സംശയം തോന്നിയ നാട്ടുകാര്‍ പൊലിസില്‍ ഏല്‍പ്പിക്കുകയും പിന്നീടുള്ള ചോദ്യം ചെയ്യലില്‍ കുറ്റം സമ്മതിക്കുകയുമായിരുന്നു. ആശുപത്രിയില്‍ നടന്ന സമാന സംഭവങ്ങളില്‍ ഇയാള്‍ക്കുള്ള പങ്ക് അറിയാനായി പൊലിസ് ചോദ്യം ചെയ്തു വരികയാണ്.
നേരത്തെ ആശുപത്രി കേന്ദ്രീകരിച്ച് മൂന്ന് പിടിച്ചുപറി സംഭവങ്ങളില്‍ നാദാപുരം പൊലിസില്‍ പരാതി ലഭിച്ചിരുന്നു. എന്നാല്‍ സംഭവങ്ങളില്‍ നാടോടികളെയാണ് സംശയിച്ചിരുന്നത്.