പയ്യന്നൂര്‍: കരിവെള്ളൂര്‍ പാലത്തര പാലത്തിന് സമീപം ഇന്നലെ രാവിലെ 9.30ഓടെ ഗ്യാസ് ടാങ്കര്‍ ചോര്‍ന്നു. പാലത്തിന് സമീപത്തെ പഴയ റോഡില്‍ നിര്‍ത്തിയിട്ട ടാങ്കര്‍ ലോറിയുടെ ഒരുവശത്തെ വാല്‍വിലൂടെയാണ് ഗ്യാസ് പുറത്തേക്കൊഴുകിയത്. പരിഭ്രാന്തരായ നാട്ടുകാര്‍ വിവരമറിയിച്ചതിനെ തുടര്‍ന്ന് ഫയര്‍ഫോഴ്‌സും പൊലിസും സ്ഥലത്തെത്തി. മംഗലാപുരത്ത് നിന്നു കോഴിക്കോട് ചേളാരിയിലേക്ക് ഗ്യാസുമായി പോവുകയായിരുന്ന ടാങ്കര്‍ ലോറിയില്‍ നിന്നാണ് ഗ്യാസ് ചോര്‍ച്ചയുണ്ടായത്. ടാങ്കറില്‍ ഗ്യാസ് നിറച്ചതിന് ശേഷം വാല്‍വിനിടയിലെ ലോക്ക് പിന്‍ ഉപയോഗിക്കാന്‍ മറന്നതാണ് ഗ്യാസ് പുറത്തേക്കൊഴുകാന്‍ കാരണമായത്. പൊലിസിന്റെയും ഫയര്‍ഫോഴ്‌സിന്റെയും സഹായത്തോടെയാണ് ഗ്യാസ് ചോര്‍ച്ച തടഞ്ഞത്. ടാങ്കറില്‍ ഡ്രൈവര്‍ മാത്രമായിരുന്നു ഉണ്ടായിരുന്നത്. സംഭവത്തില്‍ അശ്രദ്ധമായി വാഹനം കൈകാര്യം ചെയ്തതിന് ലോറി ഡ്രൈവറും തേനി സ്വദേശിയുമായ രാമകൃഷ്ണനെ പൊലിസ് കസ്റ്റഡിയിലെടുത്തു 3000 രൂപ പിഴ ഈടാക്കി വിട്ടയച്ചു.