കൊച്ചി: ജോയ്‌സ് ജോര്‍ജ് എം.പിയടക്കമുള്ളവര്‍ ഉള്‍പ്പെട്ട കൊട്ടക്കമ്പൂര്‍ ഭൂമിയിടപാട് കേസിന്റെ അന്വേഷണം ഒരുമാസത്തിനുള്ളില്‍ പൂര്‍ത്തിയാകുമെന്ന് സര്‍ക്കാര്‍ ഹൈക്കോടതിയില്‍ അറിയിച്ചു.
കൊട്ടക്കമ്പൂരില്‍ പട്ടയം അനുവദിച്ച ഭൂമി ജോയ്‌സ് ജോര്‍ജ് എം.പിയും കുടുംബാംഗങ്ങളും ചേര്‍ന്ന് തട്ടിയെടുത്തെന്നാണ് പരാതിയെന്ന് ഇന്നലെ ഹരജി പരിഗണിക്കവെ സര്‍ക്കാര്‍ വ്യക്തമാക്കി.
പട്ടയം റദ്ദാക്കിയതുമായി ബന്ധപ്പെട്ട രേഖകളടക്കമുള്ളവ പരിശോധിക്കേണ്ടതുണ്ട്. ഇതിനായി കൂടുതല്‍ സമയം വേണമെന്നും സര്‍ക്കാര്‍ ബോധിപ്പിച്ചു. തുടര്‍ന്നാണ് ഹരജി ജനുവരി പത്തിലേക്ക് മാറ്റിയത്. സി.ബി.ഐ അന്വേഷണം ആവശ്യപ്പെട്ട് ഉടുമ്പുഞ്ചോല സ്വദേശി മുകേഷ്, എന്‍.കെ ബിജു എന്നിവര്‍ നല്‍കിയ ഹരജികളാണ് ഹൈക്കോടതി പരിഗണിക്കുന്നത്.
ഈ കേസില്‍ അന്വേഷണം പൂര്‍ത്തിയാക്കി അന്തിമ റിപ്പോര്‍ട്ട് നല്‍കുന്നത് തടയണമെന്ന് ഹരജിക്കാര്‍ ആവശ്യപ്പെട്ടെങ്കിലും കോടതി നിരസിച്ചു.