റിയാദ്: സഊദിയിൽ മാർച്ച് മുതൽ നടപ്പിലാക്കുന്ന പുതിയ തൊഴിൽ പരിഷ്‌കാരങ്ങളിൽ തൊഴിൽ മന്ത്രാലയം അഭിപ്രായം സ്വീകരിക്കുന്നു. സഊദി തൊഴിൽ സാമൂഹിക വികസന മന്ത്രി എഞ്ചിനീയർ അഹമ്മദ് അൽ രാജ്‌ഹിയാണ് ഇത് സംബന്ധിച്ച് വ്യക്തമാക്കിയത്. എഴുപത് വർഷത്തെ രാജ്യത്തെ കഫാല സംവിധാനം അടക്കമുള്ള കാര്യങ്ങളിൽ വ്യക്തമായ പരിഷ്‌കാരങ്ങൾ ഉണ്ടാകുന്ന പരിഷ്‌കരണത്തിൽ തൊഴിലാളികളുടെയും തൊഴിലുടമകളുടെയും നിലവിലെ മുഴുവൻ പ്രശ്‌നങ്ങളും അവസാനിക്കുന്ന തരത്തിലുള്ള പരിഷ്‌കരണങ്ങളാണ്‌ കൊണ്ട് വരുന്നത്.

    പുതിയ തൊഴിൽ പരിഷ്കാരങ്ങളിൽ വിദേശികളുടെ എക്‌സിറ്റ് റീ എൻട്രിക്കുള്ള പണം തൊഴിലാളികൾ തന്നെ അടക്കണമെന്ന നിർദേശം ഉൾപ്പെടുത്തിയിട്ടുണ്ട്. കൂടാതെ, നിലവിലെ നിയമവ്യവസ്ഥയിലെ മിക്ക ഖണ്ഡികകളിലും മാറ്റം വരുത്തിയിട്ടുണ്ടെന്ന് മന്ത്രി പറഞ്ഞു. ഇഖാമ പുതുക്കുന്നതിനും എടുക്കുന്നതിനും പിഴയടക്കമുള്ള എല്ലാ ചെലവുകൾ, സ്‌പോണ്‍സര്‍ഷിപ് മാറ്റം, പ്രൊഫഷന്‍ മാറ്റം, മൃതദേഹം നാട്ടിലെത്തിക്കല്‍, തൊഴില്‍ കരാര്‍ അവസാനിച്ചാല്‍ നാട്ടിലേക്ക് പോകുന്നതിനുള്ള ടിക്കറ്റ് എന്നിവ തൊഴിലുടമയാണ് വഹിക്കേണ്ടത്. കൂടാതെ, തൊഴിൽ സമയം ആഴ്ച്ചയിൽ 48 മണിക്കൂറിൽ നിന്നും 40 മണിക്കൂറാക്കി ചുരുക്കൽ, റമദാനിൽ മുസ്‌ലിം തൊഴിലാളികളുടെ തൊഴിൽ സമയം ആഴ്ചയിൽ 36 മണിക്കൂറിൽ നിന്ന് 30 ആക്കി ചുരുക്കൽ വനിതകൾക്ക് നിലവിലുണ്ടായിരുന്ന 10 ആഴ്ച്ചക്ക് പകരമായി 14 ആഴ്ച ശമ്പളത്തോട് കൂടിയുള്ള പ്രസവാവധി തുടങ്ങിയ കാര്യങ്ങളും പുതിയ പരിഷ്‌കാരങ്ങളിൽ പെട്ടതാണ്.

    നിലവിലുള്ള സ്‌പോണ്‍സര്‍ഷിപ്പ് (കഫാല) സംവിധാനത്തില്‍ സമൂലമായ മാറ്റവരുത്തുന്ന നടപടികൾ, കരാര്‍ അവസാനിച്ചാല്‍ തൊഴിലുടമയുടെ അനുമതിയില്ലാതെ മറ്റൊരു ജോലിയിലേക്ക് വിദേശ തൊഴിലാളിക്ക് മാറാനുള്ള അനുമതി, റീ-എന്‍ട്രി, എക്‌സിറ്റ് പരിഷ്‌കാരം വഴി സ്‌പോണ്‍സറുടെ അനുമതിയില്ലാതെ തൊഴിലാളിക്ക് സഊദിക്ക് പുറത്ത് പോകാനുള്ള അനുവാദം, കരാര്‍ കാലാവധി അവസാനിച്ചാല്‍ തൊഴിലുടമയുടെ അനുമതി തേടാതെ ഫൈനല്‍ എക്‌സിറ്റ് വിസ നേടി നാട്ടിലേക്ക് മടങ്ങാനുള്ള അനുമതി തുടങ്ങി നിരവധി പരിഷ്‌കാരങ്ങളാണ് നടപ്പിലാക്കുന്നത്.

     ഇതിന്റെ ഭാഗമായാണ് മുന്നോടിയായി മാര്‍ച്ച് മുതല്‍ പ്രാബല്യത്തിലാവുന്ന നിയമഭേദഗതിയില്‍ അഭിപ്രായം രേഖപ്പെടുത്താന്‍ എല്ലാവര്‍ക്കും അവസരമൊരുക്കിയത്. ഫെബ്രുവരി ആറ് വരെയാണ് അഭിപ്രായം രേഖപ്പെടുത്താന്‍ അവസരം. 2021 മാര്‍ച്ച് 14 മുതല്‍ പുതിയ നിയമം പ്രാബല്യത്തില്‍ വരും. പുതിയ തൊഴിൽ പരിഷ്‌കാരങ്ങൾ അറിയാൻ ഇവിടെ ക്ലിക്ക് ചെയ്യുക