സ്വന്തം ലേഖകന്‍
തിരുവനന്തപുരം: കൊവിഡ് വ്യാപനത്തിന്റെ പശ്ചാത്തലത്തില്‍ കഴിഞ്ഞ വര്‍ഷത്തേതുപോലെ ജൂണ്‍ ഒന്നിന് ഓണ്‍ലൈനായി സ്‌കൂളുകളിലെ ക്ലാസുകള്‍ ആരംഭിക്കാന്‍ തീരുമാനം.
ഒന്നു മുതല്‍ ഒന്‍പതു വരെയുള്ള ക്ലാസുകളിലുള്ള എല്ലാവരും ജയിച്ച് അടുത്ത ക്ലാസിലെത്തും. രണ്ടു മുതല്‍ 10 വരെ ക്ലാസുകളില്‍ ആദ്യ രണ്ടാഴ്ച്ച റിവിഷനായിരിക്കും. കുട്ടികള്‍ക്ക് ലഭിച്ച ക്ലാസുകളും പഠന നിലവാരവും ചോദിച്ചറിഞ്ഞ് ഉറപ്പാക്കാന്‍ പ്രത്യേക നിര്‍ദേശമുണ്ട്. വിക്ടേഴ്‌സ് ചാനല്‍ വഴിയുള്ള ഓണ്‍ലൈന്‍ ക്ലാസുകള്‍ തന്നെയായിരിക്കും ഇത്തവണയും.
ജൂണ്‍ ഒന്നിനു തന്നെ വിക്‌ടേഴ്‌സിലും ക്ലാസ് തുടങ്ങും. ഒന്നാം ക്ലാസിലേയ്ക്കുള്ള പ്രവേശനോത്സവവും ഓണ്‍ലൈന്‍ ആയി നടത്തും. ഓണ്‍ലൈനായി നടത്തിയ ക്യു.ഐ.പി മീറ്റിങില്‍ പൊതുവിദ്യാഭ്യാസമന്ത്രി വി. ശിവന്‍കുട്ടിയാണ് ഇക്കാര്യം അറിയിച്ചത്. സ്‌കൂള്‍തല പ്രവേശനോത്സവത്തിനു തദ്ദേശഭരണ സ്ഥാപനങ്ങളുടെ സഹകരണം തേടണമെന്ന് മന്ത്രി നി ര്‍ദേശിച്ചു. വ്യക്തി താല്‍പര്യത്തിനും അതീതമായി പൊതുവിദ്യാഭ്യാസത്തിനായി ഒറ്റക്കെട്ടായി നിലകൊള്ളുന്ന അധ്യാപക സംഘടനകളെന്നു മന്ത്രി അഭിപ്രായപ്പെട്ടു. വിദ്യാഭ്യാസ മേഖലയുമായി ബന്ധപ്പെട്ട പ്രശ്‌നങ്ങള്‍ ഉള്‍പ്പെടെ വിശദമായ കാര്യങ്ങള്‍ എഴുതി നല്‍കാന്‍ അധ്യാപക സംഘടനകളോട് മന്ത്രി ആവശ്യപ്പെട്ടു.
അധ്യാപക നിയമനം വേഗത്തിലാക്കാനും നിലവില്‍ ശമ്പളം ലഭിക്കാത്തവര്‍ക്ക് അതുലഭ്യമാക്കാന്‍ നടപടി വേഗത്തിലാക്കും. കൊവിഡിന്റെ പശ്ചാത്തലത്തില്‍ അധ്യാപകര്‍ക്ക് ബുദ്ധിമുട്ട് സൃഷ്ടിക്കാത്ത തരത്തില്‍ എസ്.എസ്.എല്‍.സി, പ്ലസ്ടു മൂല്യനിര്‍ണയക്രമീകരണങ്ങള്‍ ഒരുക്കും.
എല്‍.എസ്.എസ്,യു.എസ്.എസ് പരീക്ഷ കൊവിഡ് സാഹചര്യം മനസിലാക്കി ഉചിതമായി തീരുമാനിക്കാമെന്ന് യോഗത്തില്‍ പങ്കെടുത്ത ഡി.ജി.ഇ ജീവന്‍ ബാബു അറിയിച്ചു. അധ്യാപക സംഘടനാ നേതാക്കളായ എന്‍. ശ്രീകുമാര്‍,എ. ശിവരാജന്‍, സലാഹുദ്ദീന്‍, എം.കെ ബിജു,കരിം പടുകുണ്ടില്‍, തമീമുദ്ദീന്‍, ടി. അനൂപ്, ഹരീഷ് കടവത്തൂര്‍, പി എം രാജീവ് എന്നിവര്‍ പങ്കെടുത്തു.