ദുബൈ: റമദാനിന്റെ വിശുദ്ധരാത്രിയില്‍ ഭൂമിയിലെ പുണ്യ നഗരങ്ങളുടെ ദൃശ്യങ്ങള്‍ പങ്കുവച്ച് ബഹിരാകാശത്തു നിന്നും സുല്‍ത്താന്‍ അല്‍ നയാദിയുടെ ട്വീറ്റ്. യു.എ.ഇയുടെ ബഹിരാകാശ സഞ്ചാരിയായ സുല്‍ത്താന്‍ നയാദിയാണ് കഴിഞ്ഞ ദിവസം മനോഹരങ്ങളായ ദൃശ്യങ്ങള്‍ പങ്കുവച്ചത്.
സൗദി അറേബ്യയിലെ മക്ക, പ്രവാചക നഗരമായ മദീന എന്നിവയ്ക്കു പുറമേ ജിദ്ദയുടെയും തിളങ്ങുന്ന കാഴ്ചകള്‍ അദ്ദേഹം ട്വിറ്ററിലിട്ടു.

ദീര്‍ഘകാലം ബഹിരാകാശ നിലയില്‍ താമസിക്കുന്ന ആദ്യ അറബ് സഞ്ചാരിയാണ് സുല്‍ത്താന്‍ അല്‍ നയാദി. നേരത്തെ യു.എ.ഇയിലെ സാധാരണക്കാരടക്കമുള്ളവരോട് നേരിട്ട് അദ്ദേഹം സംവദിച്ചിരുന്നു. തന്റെ രാജ്യത്തിന്റെതുള്‍പ്പെടെയുള്ള ബഹിരാകാശ ദൃശ്യങ്ങള്‍ അദ്ദേഹം പങ്കുവെക്കുകയും ചെയ്തിരുന്നു. നിരവധി പരീക്ഷണങ്ങള്‍ അവിടെ നടത്തുന്ന നയാദി ബഹിരാകാശ നടത്തത്തിനുള്ള ഒരുക്കങ്ങളും തുടരുകയാണ്.