ദുബൈ: ദുബൈ ഗ്ലോബല്‍ വില്ലേജിന്റെ പുതിയ സീസണ് ഇന്ന് തുടക്കമാകും. ആഗോളഗ്രാമത്തിന്റെ 27ാമത് സീസനാണ് ഇന്ന് തുറക്കുന്നത്. നാളെ വൈകുന്നേരം നാല് മുതല്‍ പൊതുജനങ്ങള്‍ക്ക് ഗ്ലോബല്‍ വില്ലേജിലേക്ക് പ്രവേശനം അനുവദിക്കും.ഇരുപത്തിയേഴാം സീസണില്‍ 27 പവലിയനുകളില്‍ 3,500 ഷോപ്പിങ് കേന്ദ്രങ്ങളുണ്ട.് ദിവസവും 200 ലേറെ കലാപരിപാടികള്‍ അരങ്ങേറും. ഖത്തര്‍, ഒമാന്‍ എന്നിവയുടെ പുതിയ പവലിയനുകള്‍ ഇക്കുറി ആഗോളഗ്രാമത്തിലുണ്ടാകുമെന്ന് സംഘാടകര്‍ അറിയിച്ചു. ഗ്ലോബല്‍ വില്ലേജിന് മുകളിലേക്ക് പറന്നുയര്‍ന്ന് കാഴ്ചകള്‍ കാണാവുന്ന ഹീലിയം ബലൂണ്‍ റൈഡ്, ന്യൂയോര്‍ക്ക്, ക്യൂബ, ജപ്പാന്‍, തായ്‌ലന്റ്, മെക്‌സിക്കോ, ലെബനോന്‍ എന്നിവിടങ്ങളിലെ ടാക്‌സികളില്‍ വണ്ടര്‍ റൈഡ് എന്നിവ ഇത്തവണത്തെ പ്രത്യേകതളാണ്.ബുധനാഴ്ച വൈകുന്നേരം നാല് മുതലാണ് പൊതുജനങ്ങള്‍ക്ക് പ്രവേശനം അനുവദിക്കുക. ഞായര്‍ മുതല്‍ വ്യാഴം രാത്രി 12 വരെയും വെള്ളി, ശനി, അവധി ദിനങ്ങളിലും രാത്രി ഒന്ന് വരെയും ഗ്ലോബല്‍ വില്ലേജിലേക്ക് സഞ്ചാരികള്‍ക്ക് എത്താം. ചൊവ്വാഴ്ച വനിതകള്‍ക്കും, കുട്ടികള്‍ക്കും, കുടുംബങ്ങള്‍ക്കും മാത്രമായിരിക്കും പ്രവേശനം. 18 ദിര്‍ഹം മുതലാണ് ടിക്കറ്റ് നിരക്ക്. വാല്യൂ ടിക്കറ്റ് എന്ന പേരില്‍ ഞായര്‍ മുതല്‍ വ്യാഴം വരെ ദിവസങ്ങളില്‍ ഗ്ലോബല്‍ വില്ലേജിലെത്താന്‍ പ്രത്യേക ടിക്കറ്റുണ്ടാകും. ഏത് ദിവസവും പ്രവേശിക്കാന്‍ എനി ഡേ ടിക്കറ്റുമുണ്ട്. മൊബൈല്‍ ആപ്ലിക്കേഷന്‍, വെബ്‌സൈറ്റ് എന്നിവ വഴി ടിക്കറ്റെടുക്കുന്നവര്‍ക്ക് പത്ത് ശതമാനം കിഴിവ് നല്‍കും.