കോഴിക്കോട്: ജില്ലാ ടൂറിസം പ്രമോഷന്‍ കൗണ്‍സിലിന്റെ ആഭിമുഖ്യത്തില്‍ 11 മുതല്‍ 15 വരെ നടക്കുന്ന ഓണാഘോഷ പരിപാടിയുടെ ഭാഗമായി സ്‌പോര്‍ട്‌സിനും ആയോധന കലകളുടെ പ്രദര്‍ശനത്തിനും വേദിയൊരുങ്ങുന്നു. മാനാഞ്ചിറ സ്‌ക്വയര്‍, കോര്‍പറേഷന്‍ സ്റ്റേഡിയം, കുറ്റിച്ചിറ എന്നിവയാണ് വേദികള്‍.
 11ന് രാവിലെ ഒന്‍പതിന് മാനാഞ്ചിറ സ്‌ക്വയറില്‍ തലപ്പന്ത് കളി മത്സരം നടക്കും. വൈകിട്ട് നാലിന് നടക്കുന്ന സെലിബ്രിറ്റി കമ്പവലി മത്സരത്തില്‍ ജില്ലാ കലക്ടര്‍ എന്‍. പ്രശാന്ത് നയിക്കുന്ന കലക്ടേഴ്‌സ് ടീം, കോര്‍പറേഷന്‍ മേയര്‍ തോട്ടത്തില്‍ രവീന്ദ്രന്‍ നയിക്കുന്ന മേയേര്‍സ് ടീം, ജില്ലാ പഞ്ചായത്ത് പ്രസിഡന്റ് ബാബു പറശ്ശേരി നേതൃത്വം നല്‍കുന്ന ജില്ലാ പഞ്ചായത്ത് ടീം എന്നിവയ്ക്ക് പുറമേ പ്രസ്‌ക്ലബ് നയിക്കുന്ന മാധ്യമപ്രവര്‍ത്തകരുടെ ടീമും സ്‌പോര്‍ട്‌സ് കൗണ്‍സില്‍ ടീമും പങ്കെടുക്കും.