ചെന്നൈ: ഏപ്രിൽ അഞ്ചിന് ആർസിബിയുടെ ഹോം ഗ്രൗണ്ടായ ചിന്നസ്വാമി സ്റ്റേഡിയത്തിൽ നടന്ന മത്സരത്തിനിടെയുണ്ടായ മോശം പെരുമാറ്റങ്ങൾക്കെതിരെ ചെന്നൈ സൂപ്പർ കിങ്‌സ് രംഗത്ത്. തമിഴ്നാടിന്റെ തനിമയെ പരിഹസിക്കുന്ന ഗാനങ്ങൾ ഉപയോഗിച്ചെന്നും ചെന്നൈ താരങ്ങൾക്കെതിരെ മോശം പരാമർശങ്ങൾ നടത്തിയെന്നുമാണ് ആർസിബിക്കെതിരെ ഉയർന്നിരിക്കുന്ന പരാതി.

പരാതിക്ക് ആസ്പദമായ സംഭവം

ഗാന അപ്പു സംഗീതം നൽകിയ "ദോശ, ഇഡ്ഡലി, സാമ്പാർ, ചട്‌ണി..." എന്ന് തുടങ്ങുന്ന ഗാനമാണ് വിവാദത്തിന് തുടക്കമിട്ടത്. തമിഴ് ജനതയെ സ്റ്റീരിയോടൈപ്പ് ചെയ്യാൻ സോഷ്യൽ മീഡിയയിൽ ഉപയോഗിക്കുന്ന ഈ ഗാനം ചെന്നൈ ഇന്നിങ്‌സിന് തൊട്ടുമുമ്പ് പ്ലേ ചെയ്തത് ബോധപൂർവമാണെന്ന് സിഎസ്കെ ആരോപിക്കുന്നു.ചെന്നൈ താരങ്ങൾ ഔട്ടായി മടങ്ങുമ്പോൾ സ്റ്റേഡിയത്തിലെ ഡിജെ മോശം കമന്റുകൾ പറഞ്ഞതായും പരാതിയിലുണ്ട്.

"സ്വന്തം ടീമിനെ പിന്തുണയ്ക്കാൻ ഡിജെമാർ ഉണ്ടാകാറുണ്ട്. എന്നാൽ ചിന്നസ്വാമി സ്റ്റേഡിയത്തിൽ ഞങ്ങളുടെ താരങ്ങളെ അപമാനിക്കുന്ന തരത്തിലാണ് കാര്യങ്ങൾ നടന്നത്. ഇതിൽ ബിസിസിഐ അന്വേഷണം വേണം," സിഎസ്കെ സിഇഒ കാസി വിശ്വനാഥൻ വ്യക്തമാക്കി.

പഴയ പകയുടെ ബാക്കിപത്രം?

2025-ൽ ആർസിബി താരം ജിതേഷ് ശർമ്മ ഇതേ ഗാനം പാടുന്ന വീഡിയോ പങ്കുവെച്ചത് വലിയ പ്രതിഷേധത്തിന് കാരണമായിരുന്നു. അന്ന് ചെപ്പോക്കിൽ നടന്ന മറുപടി മത്സരത്തിൽ ജിതേഷ് ഔട്ടായപ്പോൾ സിഎസ്കെ ഡിജെ ഇതേ പാട്ടിട്ട് തിരിച്ചടിച്ചിരുന്നു. എന്നാൽ പിന്നീട് ഇത്തരം പ്രകോപനങ്ങൾ പാടില്ലെന്ന് സിഎസ്കെ മാനേജ്‌മെന്റ് കർശന നിർദ്ദേശം നൽകിയിരുന്നു. ഇത് ലംഘിച്ചുകൊണ്ടാണ് ബെംഗളൂരുവിൽ വീണ്ടും വിവാദം ആവർത്തിച്ചത്.

സീസണിലെ പ്രകടനം

ഈ 2026 ഐപിഎൽ സീസണിൽ ആർസിബി 5 മത്സരങ്ങളിൽ 8 പോയിന്റുമായി ലീ​ഗ് ടേബിളിൽ ഒന്നാം സ്ഥാനത്തു നിൽക്കുമ്പോൾ,ചെന്നൈ സൂപ്പർകിങ്സ് 5 മത്സരങ്ങളിൽ നിന്ന് 4 പോയിന്റുമായി 8 സ്ഥാനത്താണ് നിൽക്കുന്നത്. 

ഏപ്രിൽ അഞ്ചിന് നടന്ന മത്സരത്തിൽ ആർസിബി ചെന്നൈയെ 43 റൺസിന് പരാജയപ്പെടുത്തിയിരുന്നു. ആദ്യം ബാറ്റ് ചെയ്ത ആർസിബി 250 റൺസെന്ന കൂറ്റൻ സ്കോർ ഉയർത്തിയപ്പോൾ, ചെന്നൈയുടെ മറുപടി 207 റൺസിൽ അവസാനിച്ചിരുന്നു.