തിരുവനന്തപുരം: സംസ്ഥാനത്ത് വൈദ്യുതി ഉപയോഗം സര്‍വകാല റെക്കോര്‍ഡില്‍. ഇന്നലത്തെ മാത്രം മൊത്തം വൈദ്യുത ഉപയോഗം 116.11 ദശലക്ഷം യൂണിറ്റായിരുന്നു. വൈകുന്നേരത്തെ ഉപയോഗവും റെക്കോര്‍ഡില്‍ എത്തി.

ഇന്നലെ വൈകുന്നേരം വൈദ്യുതി ഉപയോഗം 6013 മെഗാവാട്ട് ആയിരുന്നു. 2026 ഏപ്രില്‍ 14 നായിരുന്നു നേരത്തെ വൈകുന്നേരത്തെ റെക്കോര്‍ഡ് വൈദ്യുതി ആവശ്യകത. അന്ന് 6012 മെഗാവാട്ടായിരുന്നു ഉപയോഗം. 113.44 ദശലക്ഷമായിരുന്നു വ്യാഴാഴ്ച്ചത്തെ വൈദ്യുതി ഉപയോഗം.

കടുത്ത ചൂടിനെ തുടര്‍ന്ന് എസി ഫാന്‍ ഉപയോഗം കൂടിയതും പാചകവാതക ലഭ്യതക്കുറവിനെത്തുടര്‍ന്ന് ബദല്‍ മാര്‍ഗങ്ങള്‍ സ്വീകരിച്ചതുമാണ് വൈദ്യുതി ഉപയോഗം വര്‍ധിക്കാന്‍ കാരണമായത്. 

നിലവിലെ പ്രതിസന്ധി പരിഹരിക്കാന്‍ ആഭ്യന്തര ഉത്പാദനം വര്‍ധിപ്പിക്കുമെന്ന് കെ.എസ്.ഇ.ബി അറിയിച്ചിട്ടുണ്ട്.

അതേസമയം സംസ്ഥാനത്ത് കനത്ത ചൂട് തുടരുന്നു. ഇന്നലെ പാലക്കാട് നാല്‍പ്പത് ഡിഗ്രി സെല്‍ഷ്യസ് വരെ താപനില ഉയര്‍ന്നു.സാധാരണയേക്കാള്‍ 3.5 ഡിഗ്രി സെല്‍ഷ്യസ് കൂടുതലാണിത്. കോട്ടയത്ത് 38 ഡിഗ്രി സെല്‍ഷ്യസ് ആണ് ഇന്നലെ രേഖപ്പെടുത്തിയ ഉയര്‍ന്ന താപനില. വയനാട്,ഇടുക്കി ഒഴികെയുളള ജില്ലകളില്‍ അത്യുഷ്ണം തുടരും.

ചൂടും ഈര്‍പ്പമേറിയതുമായ അന്തരീക്ഷ സ്ഥിതിക്ക് സാധ്യതയുളളതിനാല്‍ വെയിലേല്‍ക്കുമ്പോള്‍ കരുതണമെന്ന് മുന്നറിയിപ്പുണ്ട്.ഇടുക്കി മുതല്‍ തെക്കോട്ടുളള ജില്ലകളില്‍ ഒറ്റപ്പെട്ട മഴയ്ക്ക് സാധ്യതയുണ്ട്. തിങ്കളാഴ്ച വരെ കനത്ത ചൂട് തുടരുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്

Kerala is experiencing intense heatwave conditions, leading to a surge in electricity consumption. The state recorded a usage of 116.11 million units in a single day, reflecting the growing demand for power amid rising temperatures.