ചെന്നൈ: തമിഴ്‌നാട്ടില്‍ എഐഡിഎംകെയില്‍ പൊട്ടിത്തെറി. എടപ്പാടി പളനിസ്വാമിയോട് തെറ്റിപ്പിരിഞ്ഞ് പാര്‍ട്ടിയിലെ വലിയൊരു വിഭാഗം നേതാക്കള്‍ ചേര്‍ന്ന് മുതിര്‍ന്ന നേതാവ് എസ്പി വേലുമണിയെ നിയമസഭാ കക്ഷി നേതാവായി തെരഞ്ഞെടുത്തതായാണ് റിപ്പോര്‍ട്ട്. എഐഡിഎംകെയുടെ മുപ്പതോളം എംഎല്‍എമാര്‍ യോഗത്തില്‍ പങ്കെടുത്തെന്നാണ് വിവരം. 

തെരഞ്ഞെടുപ്പില്‍ സ്വന്തം മണ്ഡലത്തില്‍ ഒരു ലക്ഷത്തിലേറെ വോട്ടിന്റെ കൂറ്റന്‍ ഭൂരിപക്ഷത്തിലാണ് എടപ്പാടി പളനിസ്വാമി ജയിച്ചുകയറിയത്. പാര്‍ട്ടിയിലെ ഒന്നാമനായി കരുതുന്ന ഇദ്ദേഹത്തെ പാര്‍ട്ടിക്കാര്‍ തന്നെ ഒതുക്കുന്നതായാണ് റിപ്പോര്‍ട്ട്. നേരത്തെ ടിവികെ സര്‍ക്കാരിനെ പിന്തുണക്കണമെന്ന് പാര്‍ട്ടിയിലെ ബഹുഭൂരിഭാഗം പേരും ആവശ്യപ്പെട്ടിരുന്നു. എന്നാല്‍ ഇതിന് ഇപിഎസ് സമ്മതം മൂളിയിരുന്നില്ല. വിജയ് യുടെ ടിവികെയുടെ ഭാഗമായാണ് എഐഡിഎംകെ അംഗങ്ങള്‍ക്ക് മന്ത്രിസ്ഥാനം വരെ ലഭിക്കുമായിരുന്നു. 

ALSO READ: കോൺഗ്രസ് നന്ദികെട്ടവർ, പ്രതിസന്ധിയിൽ ഒപ്പം നിന്നത് ഇടതും വി.സി.കെയും മാത്രം; തുറന്നടിച്ച് എം.കെ. സ്റ്റാലിൻ

എടപ്പാടിയുടെ കടുംപിടുത്തം എഐഡിഎംകെയുടെ അവസരം നഷ്ടപ്പെടുത്തിയെന്നാണ് അണികള്‍ക്കിടയില്‍ വിമര്‍ശനമുയരുന്നത്. തുടര്‍ച്ചയായി പത്ത് വര്‍ഷം അധികാരത്തിന് പുറത്തിരുന്നതും, ലോക്‌സഭാ തെരഞ്ഞെടുപ്പിലടക്കം പിന്നോട്ട് പോകുന്നതും എഐഡിഎംകെയെ കനത്ത സമ്മര്‍ദത്തിലാക്കിയിട്ടുണ്ട്. ഇപിഎസ് സമ്മതം മൂളാന്‍ വിസമ്മതിച്ചതോടെ ഡിഎംകെയിലെ ചെറുകക്ഷികളെ ചേര്‍ത്ത് വിജയ് സര്‍ക്കാരുണ്ടാക്കി. നാളെ സത്യപ്രതിജ്ഞ ചെയ്യും. 

അതേസമയം ദിവസങ്ങള്‍ നീണ്ടുനിന്ന് അനിശ്ചിതത്വങ്ങള്‍ക്ക് വിരാമമിട്ട് തമിഴ്‌നാട്ടില്‍ ടിവികെ അധ്യക്ഷന്‍ വിജയ് മുഖ്യമന്ത്രിയായി നാളെ സ്ഥാനമേല്‍ക്കും. തിരഞ്ഞെടുപ്പ് ഫലം പ്രഖ്യാപിച്ച് അഞ്ചുദിവസങ്ങള്‍ക്ക് ശേഷമാണ് ടിവികെക്ക് സര്‍ക്കാര്‍ രൂപീകരിക്കാന്‍ അനുമതി ലഭിച്ചത്. ഗവര്‍ണറുമായുണ്ടായ അസ്വാരാസ്യങ്ങളാണ് തമിഴ്‌നാടിനെ ഭരണപ്രതിസന്ധിയിലേക്ക് തള്ളിവിട്ടത്. 

ഡിഎംകെ മുന്നണിയിലെ അംഗമായിരുന്ന ചെറുകക്ഷികള്‍ പിന്തുണ പ്രഖ്യാപിച്ചതോടെയാണ് ടിവികെക്ക് കേവല ഭൂരിപക്ഷം തികയ്ക്കാനായത്. ഇതിന് പിന്നാലെ ഗവര്‍ണര്‍ ആര്‍.വി ആര്‍ലേക്കറിനെ കണ്ട് അവകാശവാദം ഉന്നയിക്കുകയായിരുന്നു. നാളെ രാവിലെ 10 മണിക്ക് ചെന്നൈയില്‍ വിജയ് തമിഴ്‌നാട് മുഖ്യമന്ത്രിയായി സത്യപ്രതിജ്ഞ ചെയ്യും. 

ALSO READ: മൃതദേഹങ്ങളിൽ നിന്ന് വസ്ത്രങ്ങൾ മോഷ്ടിച്ച് 'പുത്തൻ' എന്ന പേരിൽ വിൽപന; ഇൻഡോറിൽ വൻ മാഫിയ സംഘം പിടിയിൽ 

വിസികെയും, മുസ് ലിം ലീഗും പിന്തുണച്ചതോടെയാണ് ടിവികെ എണ്ണം തികച്ചത്. 108 സീറ്റുകളാണ് ടിവികെക്ക് ലഭിച്ചത്. അധ്യക്ഷന്‍ വിജയ് രണ്ടുസീറ്റുകളില്‍ മത്സരിച്ച് വിജയിച്ചിരുന്നു. കോണ്‍ഗ്രസ് (5), സിപിഎം (2), സിപി ഐ (2) എന്നിവരാണ് ടിവികെക്ക് പിന്തുണ പ്രഖ്യാപിച്ചത്. ഇതോടെ 234 അംഗ നിയമസഭയില്‍ വിജയ്ക്ക് 120 പേരുടെ പിന്തുണ ഉറപ്പിക്കാനായി. തമിഴ്‌നാട്ടില്‍ 118 ആണ് കേവല ഭൂരിപക്ഷം. 

അതേസമയം പുതുതായി അധികാരമേല്‍ക്കുന്ന സര്‍ക്കാര്‍ മെയ് 13നകം നിയമസഭയില്‍ വിശ്വാസവോട്ട് തേടണമെന്ന് ഗവര്‍ണര്‍ നിര്‍ദേശിച്ചിട്ടുണ്ട്. ഗവര്‍ണറുമായി നാലാംതവണ കൂടിക്കാഴ്ച്ച നടത്തിയതിന് ശേഷമാണ് സര്‍ക്കാര്‍ രൂപീകരണത്തിന് അന്തിമ തീരുമാനമായത്.

rebellion against Edappadi Palaniswami; party MLAs elected S.P. Velumani as the legislature party leader.”