തിരുവനന്തപുരം: തിരുവനന്തപുരം മെഡിക്കല്‍ കോളജ് പരിസരത്ത് നവജാത ശിശുവിന്റെ മൃതദേഹം കണ്ടെത്തിയ സംഭവത്തില്‍ അന്വേഷണം അവസാനിപ്പിച്ച് പൊലിസ്. അക്കാദമിക്ക് ആവശ്യത്തിനുവേണ്ടി ഉപയോഗിച്ചിരുന്ന മൃതദേഹം എന്നാണ് പൊലിസിന്റെ കണ്ടെത്തല്‍. 

ഒരുമാസം മുമ്പാണ് മെഡിക്കല്‍ കോളജ് പരിസരത്ത് ഏകദേശം ആറുമാസം പ്രായമുള്ള ശിശുവിന്റെ മൃതദേഹം കണ്ടെത്തിയത്. സംഭവത്തില്‍ നടത്തിയ പോസ്റ്റ്മോര്‍ട്ടത്തില്‍ മൃതദേഹത്തിന് വലിയ കാലപ്പഴക്കമുണ്ടെന്നും ശരീരത്തില്‍ ആന്തരിക അവയവങ്ങള്‍ ഒന്നുമില്ലായിരുന്നെന്നും കണ്ടെത്തി. ഇതിന്റെ അടിസ്ഥാനത്തിലാണ് അക്കാദമിക് ആവശ്യങ്ങള്‍ക്ക് ഉപയോഗിച്ച മൃതദേഹമാകാമെന്ന നിഗമനത്തിലേക്ക് പൊലിസ് എത്തിയത്.

മൃതദേഹം ഉപേക്ഷിച്ചത് ആരാണെന്ന് കണ്ടെത്താനായിട്ടില്ല. മെഡിക്കല്‍ കോളജും എസ് എ ടി ആശുപത്രി ഉള്‍പ്പെടെയുള്ള ആശുപത്രി അധികൃതരും ഇത്തരത്തില്‍ നവജാത ശിശുവിന്റെ മൃതദേഹം ആശുപത്രികളില്‍ സൂക്ഷിക്കാറില്ലെന്ന വിശദീകരണവുമായി രംഗത്തെത്തിയിരുന്നു. അന്വേഷണസംഘത്തിനുമുന്നിലും അവര്‍ ഇതേ മൊഴിയാണ് നല്‍കിയത്.

നായ്ക്കള്‍ എവിടെനിന്നെങ്കിലും മൃതദേഹം വലിച്ചുകൊണ്ടുവന്നതാകാമെന്ന അനൗദ്യോഗിക പ്രതികരണവും ആശുപത്രി അധികൃതരില്‍ നിന്ന് ഉണ്ടായിട്ടുണ്ട്.  മൃതദേഹം എങ്ങനെ ചവറുകൂനയില്‍ എത്തി എന്ന ചോദ്യത്തിന് ഇപ്പോഴും വ്യക്തമായ ഉത്തരമില്ല.

Police have closed the investigation into the incident involving the discovery of a newborn baby’s body at Thiruvananthapuram Medical College. The case had earlier drawn public attention and raised concerns regarding hospital procedures and infant care.