ഭോപ്പാൽ: മധ്യപ്രദേശിലെ ബിജെപി സർക്കാരിന്റെ വിവാദപരമായ പേരുമാറ്റ രാഷ്ട്രീയത്തിനെതിരെ സംസ്ഥാനത്ത് പരക്കെ പ്രതിഷേധം. പ്രമുഖ വിദ്യാഭ്യാസ സ്ഥാപനമായ ഭോപ്പാൽ ബർക്കത്തുല്ല സർവകലാശാലയുടെ പേര് മാറ്റി 'വാഗ്ദേവി ഭോജ്പാൽ സർവകലാശാല' എന്നാക്കാനുള്ള നീക്കമാണ് പുതിയ രാഷ്ട്രീയ പോരിലേക്ക് വഴിതുറന്നിരിക്കുന്നത്. സർവകലാശാലയിലെ ഭരണപരമായ പരാജയങ്ങളും കടുത്ത അപാകതകളും മറച്ചുവെക്കാനും പൊതുജനങ്ങളുടെ ശ്രദ്ധ തിരിക്കാനുമുള്ള ബിജെപിയുടെ തന്ത്രമാണിതെന്ന് കോൺഗ്രസ് ആരോപിച്ചു.

കഴിഞ്ഞദിവസം ചേർന്ന പ്രത്യേക എക്സിക്യൂട്ടിവ് കൗൺസിൽ യോഗമാണ് വിവാദ പേരുമാറ്റ നിർദേശത്തിന് അംഗീകാരം നൽകിയത്. ഈ ശുപാർശ അന്തിമ അനുമതിക്കായി ഗവർണറും ചാൻസലറുമായ മംഗുഭായ് സി. പട്ടേലിന് സമർപ്പിച്ചിരിക്കുകയാണ്.

കനത്ത പ്രതിഷേധം; ചരിത്രത്തെ തമസ്കരിക്കാൻ നീക്കം

പതിനൊന്നാം നൂറ്റാണ്ടിലെ രാജാ ഭോജിന്റെ സംഭാവനകളെ ആദരിക്കാനാണ് പേരുമാറ്റമെന്നാണ് ഔദ്യോഗിക വിശദീകരണമെങ്കിലും, ഇതിന് പിന്നിൽ കൃത്യമായ രാഷ്ട്രീയ അജണ്ടയുണ്ടെന്നാണ് ആക്ഷേപം. ഒരു സ്വാതന്ത്ര്യസമര സേനാനിയുടെ പേര് ബോധപൂർവ്വം വെട്ടിമാറ്റുന്നത് അംഗീകരിക്കാൻ കഴിയില്ലെന്നും, രാജാ ഭോജിന്റെ പേരിൽ മറ്റൊരു പുതിയ സർവകലാശാല സ്ഥാപിക്കുകയാണ് വേണ്ടതെന്നും ചൂണ്ടിക്കാട്ടി ഇ.സി അംഗം പ്രൊഫ. താഹിറ അബ്ബാസി യോഗത്തിൽ തീരുമാനത്തെ ശക്തമായി എതിർത്തു.

മൗലാനാ ബർക്കത്തുല്ലയ്ക്ക് ഈ പ്രദേശത്തിന് വേണ്ടി എടുത്തുപറയത്തക്ക സംഭാവനകളൊന്നുമില്ലെന്ന തരത്തിൽ പുതിയ ഇ.സി ശിപാർശയിൽ വന്നിട്ടുള്ള വിവാദ പരാമർശങ്ങൾ രാജ്യത്തിന്റെ സ്വാതന്ത്ര്യസമര ചരിത്രത്തെയും പോരാളികളെയും കടുത്ത രീതിയിൽ അപമാനിക്കുന്നതാണെന്ന വികാരം ജനങ്ങൾക്കിടയിൽ ശക്തമായിട്ടുണ്ട്.

അധികാരത്തിൽ തിരിച്ചെത്തിയാൽ റദ്ദാക്കും: കോൺഗ്രസ്

യഥാർത്ഥ പ്രശ്നങ്ങളിൽ നിന്ന് ഒളിച്ചോടാനാണ് ബിജെപി സർക്കാർ ഇത്തരം വിവാദങ്ങൾക്ക് മുൻഗണന നൽകുന്നതെന്ന് മുൻ മന്ത്രിയും കോൺഗ്രസ് നേതാവുമായ പി.സി. ശർമ വിമർശിച്ചു. 1970-ൽ സ്ഥാപിതമായ ഈ സ്ഥാപനത്തിന് 1988-ൽ ഭോപ്പാൽ സ്വദേശിയായ പ്രമുഖ സ്വാതന്ത്ര്യസമര സേനാനി പ്രഫ. ബർക്കത്തുല്ലയുടെ സ്മരണാർഥമാണ് 'ബർക്കത്തുള്ള വിശ്വവിദ്യാലയം' എന്ന് നാമകരണം ചെയ്തത്. കോൺഗ്രസ് അധികാരത്തിൽ തിരിച്ചെത്തിയാൽ ബിജെപിയുടെ ഈ ജനവിരുദ്ധ തീരുമാനം റദ്ദാക്കുമെന്നും, മാറ്റിയ എല്ലാ പഴയ പേരുകളും പുനഃസ്ഥാപിക്കുമെന്നും അദ്ദേഹം വ്യക്തമാക്കി.

The BJP government in Madhya Pradesh is facing strong criticism from the opposition Congress party over its move to rename Barkatullah University in Bhopal to 'Vagdevi Bhojpal University'.