ബ്യൂണസ് അയേഴ്സ്: ഫിഫ ലോകകപ്പ് ഫൈനലിൽ സ്പെയിനിനോടേറ്റ പരാജയത്തിന് കാരണം മോശം റഫറിയിങ് ആണെന്ന ആരാധകരുടെയും മാധ്യമങ്ങളുടെയും ആരോപണങ്ങൾ പൂർണ്ണമായി തള്ളി അർജന്റീനിയൻ പരിശീലകൻ ലയണൽ സ്കലോണി. ലോകകപ്പ് മത്സരങ്ങൾക്ക് ശേഷം നാട്ടിൽ തിരിച്ചെത്തിയ സ്കലോണിയോട്, സ്ലൊവേനിയൻ റഫറി സ്ലാവ്കോ വിൻചിചിന്റെ (Slavko Vinčić) നയങ്ങൾ അർജന്റീനയ്ക്ക് തിരിച്ചടിയായോ എന്ന മാധ്യമപ്രവർത്തകരുടെ ചോദ്യത്തിന് മറുപടി നൽകുകയായിരുന്നു അദ്ദേഹം. 

സ്പെയിൻ തങ്ങളേക്കാൾ മികച്ച രീതിയിൽ കളിച്ചതുകൊണ്ടാണ് വിജയിച്ചതെന്നും, തോൽവി അംഗീകരിക്കുന്നത് ഭാവിയിൽ ടീമിന് പ്രയോജനം ചെയ്യുമെന്നും സ്കലോണി പറഞ്ഞു.

"റഫറിയിങ് നീതിരഹിതമായിരുന്നു എന്നോ? അല്ല, ഒട്ടും അല്ല... സ്പെയിൻ നമ്മളേക്കാൾ മികച്ച ടീമായതുകൊണ്ടാണ് നമ്മൾ തോറ്റത്. അത് നമ്മൾ അംഗീകരിച്ചേ മതിയാകൂ. തോൽവി തുറന്നുസമ്മതിക്കുന്നത് ഭാവിയിൽ നമ്മളെ കൂടുതൽ കരുത്തരാക്കും. അതിശക്തമായ പോരാട്ടങ്ങൾക്ക് ശേഷമാണ് നമ്മൾ ഫൈനലിലെത്തിയത്, കളിക്കാരിൽ വലിയ ശാരീരിക ക്ഷീണം ഉണ്ടായിരുന്നുവെന്നത് ഒരു യാഥാർത്ഥ്യമാണെന്ന്."ലയണൽ സ്കലോണി പറഞ്ഞു.

മത്സരഗതിയും സ്പെയിനിന്റെ ചരിത്ര വിജയവും

ന്യൂജേഴ്‌സിയിലെ മെറ്റ്‌ലൈഫ് സ്റ്റേഡിയത്തിൽ നടന്ന കലാശപ്പോരാട്ടത്തിൽ എക്സ്ട്രാ ടൈമിന്റെ രണ്ടാം പകുതിയിലാണ് സ്പെയിൻ നിർണ്ണായക ഗോൾ നേടിയത്. 106-ാം മിനിട്ടിൽ നിക്കോ വില്യംസിന്റെ അസിസ്റ്റിൽ ഫെറാൻ ടോറസ് നേടിയ ഗോളാണ് സ്പെയിനിന് ചരിത്രത്തിലെ രണ്ടാം ലോകകപ്പ് കിരീടം സമ്മാനിച്ചത്.  

• അർജന്റീനയുടെ കളി രീതി: നിശ്ചിത സമയത്ത് (90 മിനിറ്റ്) ഒരൊറ്റ ഷോട്ട് പോലും ഉതിർക്കാൻ അർജന്റീനയ്ക്ക് കഴിഞ്ഞിരുന്നില്ല. മത്സരത്തിലുടനീളം സ്പെയിൻ പന്ത് കൈവശം വെക്കുന്നതിലും ആക്രമണത്തിലും ആധിപത്യം പുലർത്തി.
• എൻസോ ഫെർണാണ്ടസിന് റെഡ് കാർഡ്: രണ്ടാം പകുതിയുടെ ഇഞ്ചുറി ടൈമിൽ രണ്ടാമത്തെ മഞ്ഞക്കാർഡ് കണ്ട് അർജന്റീനിയൻ മിഡ്ഫീൽഡർ എൻസോ ഫെർണാണ്ടസ് പുറത്തായത് അർജന്റീനയ്ക്ക് വലിയ തിരിച്ചടിയായി. എൻസോയ്ക്ക് നൽകിയ ആദ്യ മഞ്ഞക്കാർഡ് ഒഴിവാക്കാമായിരുന്നുവെന്ന് സ്കലോണി മുൻപ് അഭിപ്രായപ്പെട്ടിരുന്നെങ്കിലും, തോൽവിക്ക് റഫറിയെ കുറ്റപ്പെടുത്താൻ അദ്ദേഹം തയ്യാറായില്ല.

അപൂർവ്വ റെക്കോർഡുമായി സ്പെയിൻ  

ലോകകപ്പിലുടനീളം തോൽവിയറിയാതെ മുന്നേറിയ സ്പെയിൻ വെറും ഒരു ഗോൾ മാത്രമാണ് ടൂർണമെന്റിലുടനീളം വഴങ്ങിയത്. ഏറ്റവും കുറവ് ഗോളുകൾ വഴങ്ങി ലോകകപ്പ് നേടുന്ന ടീമെന്ന റക്കോർഡും ഇതോടെ സ്പാനിഷ് പട സ്വന്തമാക്കി. ഫിഫ ലോകകപ്പിന്റെ ചരിത്രത്തിൽ തങ്ങൾ കളിച്ച ആദ്യ രണ്ട് ഫൈനലുകളും വിജയിക്കുന്ന മൂന്നാമത്തെ ടീം കൂടിയാണ് സ്പെയിൻ. ഇറ്റലിയും (1934, 1938) ഉറുഗ്വായുമാണ് (1930, 1950) ഇതിനുമുമ്പ് ഈ നേട്ടം കൈവരിച്ചത്.