കളമശ്ശേരി: എസ്.കെ.എസ്.എസ്.എഫ് കളമശ്ശേരി മേഖല സഹചാരി സെന്റര്‍ ഉദ്ഘാടനവും പൊതു സമ്മേളനവും ഒക്ടോബര്‍ മൂന്നിന് കങ്ങരപ്പടിയില്‍ നടക്കും. പാണക്കാട് സയ്യിദ് സാദിഖലി ശിഹാബ് തങ്ങള്‍ സെന്റര്‍ ഉദ്ഘാടനം ചെയ്യും.
സഹചാരി റിലീഫ് സെല്‍, ഇന്‍ഫര്‍മേഷന്‍ സെന്റര്‍, രോഗിപരിചരണ സാമഗ്രികള്‍, പെന്‍ഷന്‍ പദ്ധതി, വിഖായകേന്ദ്രം, ഡോക്ടര്‍ കണ്‍സല്‍ട്ടേഷന്‍, ബ്ലഡ് ഡോണേഴ്‌സ്‌ഫോറം, ഓര്‍ഗാനെറ്റ് എന്നിയാണ് സെന്ററില്‍ പ്രവര്‍ത്തിക്കുന്നത്.
എസ്.കെ.എസ്.എസ്.എഫ് സഹചാരി റിലീഫ് സെല്‍ പ്രവര്‍ത്തനങ്ങള്‍ വ്യാപിപ്പിക്കുന്നതിനായി മുഴുവന്‍ ജില്ലകളിലും വിവിധ മേഖലകള്‍ കേന്ദ്രികരിച്ച് സഹചാരി സെന്റര്‍ തുടങ്ങുന്നതിന്റെ ഭാഗമായാണ് കളമശ്ശേരിയില്‍ സെന്റര്‍ പ്രവര്‍ത്തനമാരംഭിക്കുന്നത്.
കങ്ങരപ്പടി ഇസ്‌ലാമിക് സെന്ററില്‍ കൂടിയ ഭാരവാഹികളുടെ യോഗം എസ്.കെ.എസ്.എസ്.എഫ് ജില്ലാ ജനറല്‍ സെക്രട്ടറി പി.എം ഫൈസല്‍ ഉദ്ഘാടനം ചെയ്തു.
മേഖല പ്രസിഡന്റ് പി.എ അജാസ് അധ്യക്ഷനായി. ജില്ലാ ഓര്‍ഗനൈസിങ്ങ് സെക്രട്ടറി അന്‍സാര്‍ വാഫി, ജില്ലാസെക്രട്ടറി മുഹമ്മദ് ഹസിം, വിഖായ ജില്ലാകണ്‍വീനര്‍ നിയാസ് മുണ്ടുപാലം, മേഖല വര്‍ക്കിങ്ങ് സെക്രട്ടറി ആസിഫ് കാരുവള്ളി, വൈസ് പ്രസിഡന്റുമാരായ കെ.എച്ച് ഷാനവാസ്, എ.കെ അബുബക്കര്‍, മേഖല ജനറല്‍ സെക്രട്ടറി നൗഫല്‍, ട്രഷറര്‍ മുഹമ്മദ് സാദിഖ് എന്നിവര്‍ സംസാരിച്ചു.