ഗുവാഹത്തി: ഐ.എസ്.എല്ലിന്റെ ചരിത്രത്തില്‍ ഇന്നുവരെ പരാജയപ്പെടുത്താന്‍ സാധിക്കാതിരുന്ന നോര്‍ത്ത്ഈസ്റ്റ് യുനൈറ്റഡിനെ ഒടുവില്‍ ചെന്നൈയിന്‍ എഫ്.സി വീഴ്ത്തി.
അതും അവരുടെ മണ്ണില്‍ വച്ചു തന്നെ. മറുപടിയില്ലാത്ത ഒറ്റ ഗോളിനാണ് സൂപ്പര്‍ മച്ചാന്‍സ് വിജയം സ്വന്തമാക്കിയത്. ഈ സീസണില്‍ ചെന്നൈയിന്‍ നേടുന്ന രണ്ടാം വിജയവും വടക്കുകിഴക്കന്‍മാരുടെ രണ്ടാം തോല്‍വിയുമാണിത്. തോറ്റെങ്കിലും നോര്‍ത്ത്ഈസ്റ്റ് തന്നെ ഒന്നാം സ്ഥാനത്ത്. ജയത്തോടെ ഏഴു പോയിന്റുകളുമായി ചെന്നൈയിന്‍ മൂന്നാം സ്ഥാനത്തേക്ക് കയറി. ഡേവിഡ് സുസ്സി നേടിയ ഗോളാണ് ചെന്നൈയിന് വിജയമൊരുക്കിയത്.
കളിയുടെ തുടക്കം മുതല്‍ ആക്രമിച്ചു കളിച്ച ചെന്നൈയിന്‍ പലപ്പോഴും ഗോളിനടുത്തെത്തിയെങ്കിലും നോര്‍ത്ത്ഈസ്റ്റ് ഗോള്‍ കീപ്പര്‍ സുബ്രതോ പാലിന്റെ മിന്നല്‍ സേവുകളാണ് അവര്‍ക്ക് തിരിച്ചടിയായത്. ആദ്യ പകുതി ഗോള്‍രഹിതമായപ്പോള്‍ രണ്ടാം പകുതി തുടങ്ങി 49ാം മിനുട്ടിലാണ് സുസ്സി ചെന്നൈയിന് വിജയമൊരുക്കിയ ഗോള്‍ വലയിലാക്കിയത്.
സിയാം ഹെംഗല്‍ കൈമാറിയ പാസിനെ ഒരു സിസ്സര്‍ കിക്കിലൂടെ സുന്ദരമായി വലയിലാക്കുകയായിരുന്നു സുസ്സി. ഗോള്‍ വീണതോടെ നോര്‍ത്ത്ഈസ്റ്റ് മടക്കാനായി കിണഞ്ഞു ശ്രമിച്ചെങ്കിലും ചെന്നൈയിന്‍ പ്രതിരോധം കടുപ്പിച്ചു വിജയം സ്വന്തമാക്കുകയായിരുന്നു.