കോതമംഗലം: ഏകീകൃത സിവില്‍ കോഡെന്നാല്‍ മുസ്‌ലിം വ്യക്തി നിയമത്തിലെ മുത്തലാക്ക് മാത്രമല്ലെന്നും നടപ്പാക്കാന്‍ ഉദ്ദേശിക്കുന്ന പൗരനിയമത്തിന്റെ രൂപരേഖ പ്രസിദ്ധികരിക്കണമെന്നും ജമാഅത്ത് കൗണ്‍സില്‍ താലൂക്ക് കമ്മിറ്റി ആവശ്യപ്പെട്ടു. മത നിയമങ്ങളിലും ആചാരങ്ങളിലും അതിക്രമിച്ച് കൈകടത്തരുതെന്നും എല്ലാ മത വിഭാഗങ്ങളുമായും ചര്‍ച്ചയിലൂടെ പ്രശ്‌നങ്ങള്‍ പരിഹരിക്കണമെന്നും ആവശ്യപ്പെട്ട് സര്‍ക്കാരിന് നിവേദനം നല്‍കി. 13000 ത്തിലധികം വരുന്ന മഹല്ലുകളെ ഏകോപിപ്പിച്ച് മുസ്‌ലിം കുടുംബിനികളുടെ ഒപ്പുശേഖരണം നടത്തി സര്‍ക്കാരിന് നിവേദനം നല്‍കും. ഇതിന്റെ ഭാഗമായി താലൂക്കിലെ 60 ലധികം മഹല്ലുകളില്‍ സന്ദര്‍ശനവും നടത്തും. സംസ്ഥാന ട്രഷറര്‍ എം.എം മുഹമ്മദ് ഹാജി യോഗം ഉദ്ഘാടനം ചെയ്തു. കെ.ഇ അബ്ദുള്‍സത്താര്‍ അധ്യക്ഷത വഹിച്ചു. എം മുത്തുക്കുഞ്ഞ് മാസ്റ്റര്‍, പി.എം മുഹമ്മദാലി, സി.കെ അലിയാര്‍, ജസില്‍ തോട്ടത്തിക്കുളം എന്നിവര്‍ സംസാരിച്ചു.