ചെറുവത്തൂര്‍: ഇന്ത്യന്‍ കബഡി ടീം കാപ്റ്റന്‍ അനൂപ് കുമാറിന് ചെറുവത്തൂരില്‍ ഊഷ്മള സ്വീകരണം. കേരളത്തിന്റെ മണ്ണിലേക്ക് ആദ്യമായെത്തിയ അനൂപ് കുമാറിനെ കയ്യൂര്‍ റോഡില്‍ നിന്നും ചെറുവത്തൂരിലെ പൗരാവലിക്കുവേണ്ടി പഞ്ചായത്ത് പ്രസിഡന്റ് മാധവന്‍ മണിയറ ഹാരാര്‍പ്പണം നടത്തി സ്വീകരിച്ചു.
ബാന്റ് മേളത്തിന്റ അകമ്പടിയോടെ നടന്ന ഘോഷയാത്രയില്‍ ജനപ്രതിനിധികള്‍, തൊഴിലാളികള്‍ തുടങ്ങി സമസ്തമേഖലയിലുള്ളവരും അണിചേര്‍ന്നു. തുടര്‍ന്ന് പഞ്ചായത്ത് ഇ.എം.എസ് സ്മാരക ഹാളില്‍ നടന്ന അനുമോദന സമ്മേളനത്തില്‍ പഞ്ചായത്ത് പ്രസിഡന്റ് മാധവന്‍ മണിയറ ഉപഹാര സമര്‍പ്പണം നടത്തി.എം.അച്യുതന്‍ അധ്യക്ഷനായി. ഇന്റര്‍നാഷണല്‍ മാസ്റ്റേര്‍ഴ്‌സ് അത്‌ലറ്റിക് മീറ്റില്‍ സ്വര്‍ണമെഡല്‍ നേടിയ പവിത്രന്‍ മാടക്കാല്‍, പ്രോകബഡി താരങ്ങളായ സുകേഷ് ഹെഗ്‌ഡേ, പ്രശാന്ത് റായ്, ഷബീര്‍ ബാപ്പു, ഷറഫുദ്ദീന്‍, ജഗദീഷ് കുമ്പള എന്നിവരെയും ചടങ്ങില്‍ ആദരിച്ചു. കബഡി അസോസിയേഷന്‍ കണ്ണൂര്‍ ജില്ലാ സെക്രട്ടറി കെ.ദാമോദരന്‍, ടി.വി കൃഷ്ണന്‍ എന്നിവര്‍ സംസാരിച്ചു.