മോണോ ആക്ട് വേദിയില്‍ വീണു വിദ്യാര്‍ഥിനിക്കു പരുക്ക്. മൊകേരി രാജീവ്ഗാന്ധി മെമ്മോറിയല്‍ ഹയര്‍ സെക്കന്‍ഡറി സ്‌കൂള്‍ വിദ്യാര്‍ഥിനി മാളവിക സുരേഷിനാണ് പരുക്കേറ്റത്. സെന്റ് ജോസഫ്‌സ് ഹയര്‍ സെക്കന്‍ഡറി സകൂളിലെ വേദിയില്‍ മോണോ ആക്ട് മത്സര വേദിയിലെ തറയില്‍ വിരിച്ച ഷീറ്റില്‍ തടഞ്ഞാണ് മാളവിക തലയിടിച്ചു വീണത്. തലക്ക് വീഴ്ചയില്‍ പരുക്കേറ്റു. വിദ്യാര്‍ഥിനി വേദിയില്‍ വീണിട്ടും സംഘാടകര്‍ അടുത്ത മത്സരാര്‍ഥിയെ മത്സരത്തിനു ക്ഷണിച്ചത് ബഹളത്തിനിടയാക്കി. ഒടുവില്‍ മാളവികയുടെ കൂടെ എത്തിയ അധ്യാപകര്‍ സ്വകാര്യ വാഹനം പിടിച്ച് സമീപത്തെ തലശ്ശേരി ജനറലല്‍ ആശുപത്രിയിലെത്തിക്കുകയായിരുന്നു.
ബെഞ്ച് കൂട്ടിയിട്ട് ഒരുക്കിയ മോണോ ആക്ട് വേദിയെ ക്കുറിച്ച് രാവിലെ തന്നെ അധ്യാപകരും പരിശീലകരും പ്രതിഷേധമറിയിച്ചിരുന്നു. ഏറെ നേരം വാക്കേറ്റവും നടന്നു. ഇളകിയാടുന്ന സ്റ്റേജില്‍ മോണോ ആക്ട് അവതരിപ്പിക്കാന്‍ സാധിക്കില്ലെന്ന് അധ്യാപകരും മറ്റും പറഞ്ഞപ്പോള്‍ സംഘാടകര്‍ എതിര്‍ക്കുകയായിരുന്നു. ബഹളം മൂലം രണ്ട് മണിക്കൂര്‍ വൈകിയാണ് മോണോ ആക്ട് മത്സരം ആരംഭിച്ചത്.