മെല്‍ബണ്‍: പാകിസ്താനെതിരായ രണ്ടാം ക്രിക്കറ്റ് ടെസ്റ്റില്‍ ആസ്‌ത്രേലിയ തിരിച്ചടിക്കുന്നു. പാകിസ്താനെതിരേ ഒന്നാമിന്നിങ്‌സ് സ്‌കോര്‍ 443 റണ്‍സിനെതിരേ മൂന്നാം ദിനം കളിയവസാനിക്കുമ്പോള്‍ രണ്ടു വിക്കറ്റ് നഷ്ടത്തില്‍ 278 റണ്‍സെടുത്തിട്ടുണ്ട് ആസ്‌ത്രേലിയ. ഡേവിഡ് വാര്‍ണ(144)റുടെ സെഞ്ച്വറിയാണ് ഓസീസിന് മികച്ച തുടക്കം സമ്മാനിച്ചത്.

മൂന്നാം ദിനം കളിയവസാനിക്കുമ്പോള്‍ ഉസ്മാന്‍ കവാജ(95*) സ്റ്റീവന്‍ സ്മിത്ത്(10*) എന്നിവരാണ് ക്രീസില്‍. വാര്‍ണറിന് പുറമേ മാറ്റ് റെന്‍ഷാ(10) ആണ് പുറത്തായ മറ്റൊരു താരം. 143 പന്തില്‍ 17 ബൗണ്ടറിയും ഒരു സിക്‌സറും അടങ്ങുന്നതാണ് വാര്‍ണറുടെ ഇന്നിങ്‌സ്. വഹാബ് റിയാസാണ് താരത്തെ പുറത്തത്താക്കിയത്. കവാജയുടെ ഇന്നിങ്‌സില്‍ 13 ബൗണ്ടറിയുണ്ട്.

നേരത്തെ ആറിന് 310 റണ്‍സ് എന്ന നിലയില്‍ ബാറ്റിങ് പുനരാരംഭിച്ച പാകിസ്താന്‍ ഒന്‍പതിന് 443 റണ്‍സെടുത്ത് ഡിക്ലയര്‍ ചെയ്യുകയായിരുന്നു. അസ്ഹര്‍ അലി(205*) പുറത്താകാതെ നേടിയ ഇരട്ട സെഞ്ച്വറിയുടെ മികവിലാണ് പാകിസ്താന്‍ സ്‌കോര്‍ 400 കടത്തിയത്. സൊഹൈല്‍ ഖാന്‍(65) മികച്ച പിന്തുണ നല്‍കി. 364 പന്തില്‍ 20 ബൗണ്ടറിയടക്കമാണ് അസ്ഹര്‍ ഇരട്ട സെഞ്ച്വറി തികച്ചത്. ആസ്‌ത്രേലിയക്ക് വേണ്ടി ഹാസെല്‍വുഡ്, ജാക്‌സണ്‍ ബേര്‍ഡ് എന്നിവര്‍ മൂന്നു വിക്കറ്റെടുത്തു.