കരുവാരകുണ്ട്: മൊബൈല്‍ ഫോണിലേക്കു വന്ന വിളിയുടെ അടിസ്ഥാനത്തില്‍ എ.ടി.എം പിന്‍ നമ്പര്‍ പറഞ്ഞുകൊടുത്തയാള്‍ക്കു പണം നഷ്ടമായി. ഇന്നലെ രാവിലെ രാവിലെ 10ന് മുംബൈ ആസ്ഥാനമായി പ്രവര്‍ത്തിക്കുന്ന എസ്.ബി.ടി എ.ടി.എം ഓഫിസില്‍നിന്നാണെന്നു പറഞ്ഞാണ് വിളി വന്നത്.
വിളിച്ചയാള്‍ എ.ടി.എം കോഡ് നമ്പര്‍ ആവശ്യപ്പെടുകയായിരുന്നു. എന്തിനാണെന്നു ചോദിച്ചപ്പോള്‍ കാലാവധി പരിശോധിക്കാനാണെന്നു മറുപടി പറഞ്ഞത്രേ. എസ്.ബി.ടി, എസ്.ബി.ഐ ലയനം സംബന്ധിച്ചാണ് നടപടിയെന്നും പറഞ്ഞു. ഇതോടെ നമ്പര്‍ നല്‍കിയയാള്‍ക്കാണ് പണം നഷ്ടപ്പെട്ടത്.
അല്‍പ സമയം കഴിഞ്ഞ് അക്കൗണ്ടില്‍നിന്ന് 9,990 രൂപ നഷ്ടമായതായി മൊബൈല്‍ നമ്പറിലേക്ക് സന്ദേശം വരികയായിരുന്നു. ഇതോടെയാണ് തട്ടിപ്പിനിരയായതായി മനസിലായത്. ഉടനെ എ.ടി.എം കാര്‍ഡ് ബ്ലോക്ക് ചെയ്തു. കരുവാരകുണ്ട് പൊലിസില്‍ പരാതി നല്‍കി.