കോഴിക്കോട്: അത്തോളി കുനിയില്‍ക്കടവ് പാലത്തിനു സമീപം പുഴയില്‍ മത്സ്യ ബന്ധനത്തിനിടെ ഒരു കുടുംബത്തിലെ നാലുപേര്‍ ഒഴുക്കില്‍പ്പെട്ടു. മൂന്നുപേരെ രക്ഷപ്പെടുത്തി.
രാത്രിയോടെ കരയില്‍ നിന്ന് ഒറ്റല്‍ ഉപയോഗിച്ച് മത്സ്യ ബന്ധനം നടത്തുകയായിരുന്ന കുടുംബത്തിലെ നാലുപേരാണ് അപകടത്തില്‍പ്പെട്ടത്. അത്തോളി അത്താണി ചേലാക്കര മുസ്തഫ(50)യെയാണ് കാണാതായത്. അപകടത്തില്‍പെട്ട മക്കളെ രക്ഷപ്പെടുത്താനുള്ള ശ്രമത്തിനിടെയാണ് മുസ്തഫയെ കാണാതായത്. ഇദ്ദേഹത്തിന് വേണ്ടിയുള്ള തിരച്ചില്‍ തുടരുന്നു. മുസ്തഫയുടെ രണ്ടുമക്കളെയും അനുജന്റെ മകനെയും നാട്ടുകാര്‍ ചേര്‍ന്ന് രക്ഷപ്പെടുത്തി. രക്ഷപ്പെടുത്തിയ അദ്‌നാന്‍, റാസിക്ക്, ഷഹനാസ് എന്നിവരെ അത്തോളി സഹകരണാശുപത്രിയില്‍ പ്രവേശിപ്പിച്ചു. ബീച്ച് ഫയര്‍ഫോഴ്‌സും സ്ഥലത്തെത്തി രക്ഷാപ്രവര്‍ത്തനത്തില്‍ പങ്കുചേര്‍ന്നു. കാണാതായ ഒരാള്‍ക്കുവേണ്ടിയുള്ള തിരച്ചില്‍ അത്തോളി പൊലിസിന്റെ നേതൃത്വത്തില്‍ തുടരുന്നു.