തിരുവനന്തപുരം: മാലിന്യപ്രതിസന്ധി പൂര്‍ണമായും തുടച്ചു നീക്കണമെങ്കില്‍ നിലവിലെ മുനിസിപ്പാലിറ്റി നിയമം പൊളിച്ചെഴുതണമെന്ന് മന്ത്രി ടി.എം തോമസ് ഐസക്. പായ്ക്കറ്റ് സാധനങ്ങളുടെ പ്ലാസ്റ്റിക് മാലിന്യങ്ങള്‍ കമ്പനികള്‍ തന്നെ തിരിച്ചെടുക്കണമെന്ന് നേരത്തെ വ്യവസ്ഥയുണ്ടായിരുന്നു. എന്നാല്‍ കഴിഞ്ഞ തവണത്തെ നിയമഭേദഗതികളില്‍ ഈ വ്യവസ്ഥ ഉള്‍പ്പെടുത്തിയിരുന്നില്ല. കവര്‍ മാലിന്യങ്ങള്‍ വില്‍ക്കുന്നവര്‍ തന്നെ തിരിച്ചെടുത്താല്‍ പകുതി മാലിന്യപ്രശ്‌നം അതോടെ തീരും. ഇതിനായി നിയമഭേദഗതി ആവശ്യമാണ്. പൊതുജനസമ്മര്‍ദമുണ്ടായാല്‍ നിയമനിര്‍മാണ ഭേദഗതി ആലോചിക്കാവുന്നതേയുള്ളൂ. ഇതിനുവേണ്ടി സംസ്ഥാനതലത്തില്‍ നിയമവിദ്യാര്‍ഥികളുടെ ഒരു കണ്‍വന്‍ഷന്‍ വിളിച്ചുചേര്‍ക്കുന്ന കാര്യം പരിഗണിക്കാമെന്നും മന്ത്രി പറഞ്ഞു. വഴുതക്കാട് ഫ്രീമേസന്‍ ഹാളില്‍ നടന്ന ഹരിതനഗരോത്സവം ശില്‍പശാല ഉദ്ഘാടനം ചെയ്യുകയായിരുന്നു മന്ത്രി.