കോഴിക്കോട്: സി.ഐ.ടി.യു അഖിലേന്ത്യാ ജനറല്‍ കൗണ്‍സില്‍ 23 മുതല്‍ 26 വരെ കോഴിക്കോട്ട് നടക്കുമെന്ന് സംഘാടകസമിതി ചെയര്‍മാന്‍ എളമരംകരീം വാര്‍ത്താസമ്മേളനത്തില്‍ പറഞ്ഞു. 23ന് രാവിലെ 10ന് കോഴിക്കോട് ടാഗോര്‍ സെന്റിനറി ഹാളില്‍ സി.ഐ.ടി.യു അഖിലേന്ത്യാ പ്രസിഡന്റ് ഡോ. ഹേമലത ആമുഖ പ്രഭാഷണം നടത്തും.
24നും 25നും നടക്കുന്ന ജനറല്‍ കൗണ്‍സില്‍ 26ന് ഉച്ചയോടെ സമാപിക്കും. 26ന് വൈകിട്ട് കോഴിക്കോട് കടപ്പുറത്ത് ഒരു ലക്ഷം പേര്‍ പങ്കെടുക്കുന്ന കൂറ്റന്‍ റാലിയോടെയാണ് സമാപനം.
റാലി മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. സി.ഐ.ടി.യു അഖിലേന്ത്യ പ്രസിഡന്റ് ഡോ. ഹേമലത, ജനറല്‍സെക്രട്ടറി തപന്‍സെന്‍, വൈസ്പ്രസിഡന്റ് എ.കെ. പത്മനാഭന്‍, സംസ്ഥാന ജനറല്‍ സെക്രട്ടറി എളമരം കരീം, പ്രസിഡന്റ് ആനത്തലവട്ടം ആനന്ദന്‍ തുടങ്ങിയവര്‍ പ്രസംഗിക്കും.
1993ല്‍ ഭുവനേശ്വറില്‍ നടന്ന ജനറല്‍ കൗണ്‍സില്‍ അംഗീകരിച്ച സി.ഐ.ടി.യു സംഘടനാ രേഖ കാലോചിതമായി പുതുക്കുന്ന ചുമതലയും കോഴിക്കോട് ജനറല്‍ കൗണ്‍സില്‍ നിര്‍വഹിക്കുമെന്ന് എളമരംകരീം പറഞ്ഞു.
വാര്‍ത്താസമ്മേളനത്തില്‍ സംഘാടകസമിതി ജനറല്‍കണ്‍വീനര്‍ പി.കെ. മുകുന്ദനും പങ്കെടുത്തു.