കൊണ്ടോട്ടി: നഗരസഭാ വൈസ് ചെയര്‍പേഴ്‌സണായി യു.ഡി.എഫ് സ്ഥാനാര്‍ഥിമുസ്‌ലിം ലീഗിലെ പാലക്കല്‍ ഷറീന തെരഞ്ഞെടുക്കപ്പെട്ടു. 40 അംഗ കൗണ്‍സിലില്‍ ഷറീനയ്ക്ക് 29 വോട്ടും എതിര്‍ സ്ഥാനാര്‍ഥി എല്‍.ഡി.എഫിലെ ഗീതയ്ക്ക് ഒന്‍പതു വോട്ടുമാണ് ലഭിച്ചത്.
ചട്ടപ്രകാരമല്ല നാമനിര്‍ദേശം സ്വീകരിച്ചതെന്ന പ്രതിപക്ഷത്തിന്റെ പരാതിയെ തുടര്‍ന്നു സ്റ്റാന്‍ഡിങ് കമ്മിറ്റികളിലേക്കുള്ള തെരഞ്ഞെടുപ്പ് മാറ്റിവച്ചു.
നഗരസഭ 31ാം വാര്‍ഡായ മേക്കാടുനിന്നുള്ള കൗണ്‍സിലറാണ് ഷറീന. എസ്.ഡി.പി.ഐ അംഗം വി. അബ്ദുല്‍ ഹക്കീം തെരഞ്ഞെടുപ്പിന് എത്തിയിരുന്നില്ല. എല്‍.ഡി.എഫ് അംഗം സൗദാമിനിയുടെ വോട്ട് അസാധുവായി. വൈസ് ചെയര്‍പേഴ്‌സണ് ചെയര്‍മാന്‍ സി.കെ നാടിക്കുട്ടി സത്യവാചകം ചൊല്ലിക്കൊടുത്തു.
ചെയര്‍മാന്‍ തെരഞ്ഞെടുപ്പില്‍ വോട്ട് ബഹിഷ്‌കരിച്ച കോണ്‍ഗ്രസിലെ നീറ്റാണിമ്മല്‍ വാര്‍ഡ് കൗണ്‍സിലര്‍ പറമ്പാടന്‍ സൈതലവിയും ഇത്തവണ യു.ഡി.എഫിന് അനുകൂലമായി വോട്ട് ചെയ്തു.
സ്റ്റാന്‍ഡിങ് കമ്മിറ്റികളിലേക്കുള്ള തെരഞ്ഞെടുപ്പില്‍ മത്സരിക്കുന്ന യു.ഡി.എഫ് അംഗങ്ങളുടെ നാമനിര്‍ദേശ പത്രിക വൈകിയതു ചോദ്യം ചെയ്ത് പ്രതിപക്ഷം നല്‍കിയ പരാതിയിലാണ് വോട്ടെടുപ്പ് മാറ്റിയത്.
ഉച്ചയ്ക്കാണ് ഇതിലേക്കു വോട്ടെടുപ്പ് നടക്കേണ്ടിയിരുന്നത്. രണ്ടിനു നടക്കുന്ന തെരഞ്ഞെടുപ്പിന് 1.30നു പത്രിക നല്‍കണമെന്നാണ് ചട്ടം.
എന്നാല്‍, യു.ഡി.എഫ് ഉച്ചയ്ക്കു രണ്ടിനാണ് പത്രിക നല്‍കിയത്.
പ്രതിപക്ഷത്തിന്റെ പരാതി പരിഗണിച്ച റിട്ടേണിങ് ഓഫിസര്‍ ഇടതു മുന്നണിയും 1.30നു ശേഷമാണ് പത്രിക നല്‍കിയതെന്നു വ്യക്തമാക്കി തെരഞ്ഞെടുപ്പ് മാറ്റുകയായിരുന്നു. രണ്ടാഴ്ചയ്ക്കു ശേഷം വീണ്ടും തെരഞ്ഞെടുപ്പ് നടക്കും.