പീരുമേട്: മോഷ്ടിച്ച ബൈക്കുമായി രണ്ടു യുവാക്കള്‍ പീരുമേട് പൊലിസ് പിടിയില്‍. പാല സ്വദേശി അമല്‍ വിനോദ് (19), ചങ്ങനാശ്ശേരി കങ്ങഴ സ്വദേശി അബിന്‍ (19) എന്നിവരാണ് പിടിയിലായത്.
ഇന്നലെ ഉച്ചകഴിഞ്ഞ് പീരുമേട് താലൂക്ക് ആശുപത്രിയില്‍ നിന്നുമാണ് ഇവര്‍ ബൈക്ക് മോഷ്ടിച്ചത്. പീരുമേട് മേഖലയില്‍ ഇവര്‍ ഉണ്ടെന്നുള്ള രഹസ്യ വിവരത്തെ തുടര്‍ന്ന് നടത്തിയ അന്വേഷണത്തിലാണ് മോഷ്ടിച്ച ഇരുചക്ര വാഹനവുമായി കുട്ടിക്കാനത്തു നിന്നും ഇരുവരും പൊലിസ് പിടിയിലായത്. ഇവര്‍ കഞ്ചാവ് കേസിലും പ്രതികളാണെന്ന് പൊലിസ് പറഞ്ഞു. സംസ്ഥാനത്തിന്റെ വിവിധ ജില്ലകള്‍ കേന്ദ്രീകരിച്ചായിരുന്നു യുവാക്കള്‍ മോഷണം നടത്തിയിരുന്നത്. ഇരുചക്ര വാഹനങ്ങളാണ് ഇവര്‍ മോഷ്ടിക്കുന്നത്. സംസ്ഥാനത്തിന്റെ വിവിധ സ്‌റ്റേഷനുകളിലായി എട്ടോളം കേസുകള്‍ ഇവര്‍ക്കെതിരെ നിലവിലുണ്ട്. മോഷണം പതിവാക്കിയ യുവാക്കളുടെ മറ്റു ബന്ധങ്ങള്‍ പൊലിസ് അന്വേഷിച്ചുവരികയാണ്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.