മൂന്നാര്‍: വട്ടവടയിലെ റിസോര്‍ട്ടിനു സമീപമുള്ള പൂന്തോട്ടത്തില്‍ കഞ്ചാവുചെടികള്‍ വളര്‍ത്തിയ രണ്ടുപേര്‍ എക്‌സൈസിന്റെ പിടിയിലായി.
മറ്റൊരു സംഭവത്തില്‍ ചിലന്തിയാറിലെ കൃഷിയിടത്തില്‍നിന്ന് 850 ഗ്രാം കഞ്ചാവും പിടിച്ചെടുത്തു. വട്ടവട കോവിലൂരിനു സമീപമുള്ള ആനന്ദ് റിസോര്‍ട്ടിലെ ജീവനക്കാരായ കൊട്ടാക്കമ്പൂര്‍ പുതുവീട്ടില്‍ ജെ.പ്രഭു (30), കോവിലൂര്‍ ആദിമന്ത്രാലയം വീട്ടില്‍ ആര്‍.സുരേഷ്(23) എന്നിവരാണ് അറസ്റ്റിലായത്. റിസോര്‍ട്ട് കേന്ദ്രീകരിച്ച് വിനോദസഞ്ചാരികള്‍ക്ക് കഞ്ചാവ് വില്‍ക്കുന്നെന്ന വിവരത്തെത്തുടര്‍ന്ന് നടത്തിയ പരിശോധനയിലാണ് പൂന്തോട്ടത്തില്‍ ആറ് കഞ്ചാവുചെടികള്‍ കണ്ടെത്തിയത്. അന്വേഷണത്തില്‍ ഇരുവരും ചേര്‍ന്നാണ് കഞ്ചാവുചെടികള്‍ വളര്‍ത്തിയതെന്ന് ഉദ്യോഗസ്ഥര്‍ കണ്ടെത്തി. പ്രതികളെ ദേവികുളം കോടതിയില്‍ ഹാജരാക്കി റിമാന്‍ഡ് ചെയ്തു.
ചിലന്തിയാറിലുള്ള ചെല്ലപ്പാണ്ടി എന്നയാളുടെ കൃഷിയിടത്തിലെ ഷെഡ്ഡില്‍ നിന്നാണ് 850 ഗ്രാം കഞ്ചാവ് കണ്ടെത്തിയത്. ഇയാള്‍ക്കായി അന്വേഷണം നടത്തിവരുകയാണ്. എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ടോമി ജേക്കബ്, പ്രിവന്റീവ് ഓഫീസര്‍മാരായ എസ്.ബാലസുബ്രമണ്യന്‍, സി.ഇ.ഓ.മാരായ എ.സി. നെബു, കെ.എസ്.മീരാന്‍, കെ.പി.ജോസഫ് എന്നിവരുടെ നേതൃത്വത്തിലാണ് റെയ്ഡ് നടത്തിയത്.