ഷൊര്‍ണൂര്‍: റെയില്‍പാലത്തിലൂടെ കടന്നുപോകുകയായിരുന്ന ട്രെയിനില്‍ നിന്ന് ഭാരതപ്പുഴയിലേക്ക് വീണ യുവാവിന് സാരമായി പരുക്കേറ്റു. വാടാനാപ്പള്ളി തളിക്കുളം പള്ളത്ത് തൊട്ടേക്കാട്ട് വീട്ടില്‍ അബ്ദുല്‍ നാസറിന്റെ മകന്‍ അനസ് (28)നാണ് പരുക്കേറ്റത്. ഇന്നലെ ഉച്ചക്ക് രണ്ടരയോടെ മംഗലാപുരത്ത് നിന്ന് നാഗര്‍കോവിലിലേക്ക് പോകുന്ന ഏറനാട് എക്‌സ്പ്രസ്സില്‍ നിന്നാണ് അനസ്സ് പുഴയിലേക്ക് വീണത്. പുഴയില്‍ വീണ സ്ഥലത്ത് ചെറിയ തോതില്‍ വെള്ളമുണ്ടായിരുന്നു. കാലുകള്‍ക്കാണ് പരുക്ക്. രണ്ടാമത്തെ റെയില്‍ പാലത്തിലൂടെ കടന്നു പോകുകയായിരുന്ന വേണാട് എകസ് പ്രസ്സിലെ യാത്രക്കാര്‍ റെയില്‍വെ പൊലിസിനെ വിവരമറിയിക്കുകയായിരുന്നു. യുവാവിനെ തൃശൂര്‍ മെഡിക്കല്‍ കോളജ് ആസ്പത്രിയില്‍ പ്രവേശിപ്പിച്ചു.