ലഖ്‌നൗ: ബി.ജെ.പി എം.എല്‍.എ കുല്‍ദീപ് സിങ് സെനഗറുമായി അടുത്ത ബന്ധമുണ്ടായിരുന്നുവെന്നും നേരത്തെ അദ്ദേഹം തങ്ങളുടെ വീടിനടുത്തായിരുന്നു താമസിച്ചിരുന്നതെന്നും ഉന്നാവോയില്‍ അദ്ദേഹത്തിന്റെ പീഡനത്തിനിരയായ പതിനെട്ടുകാരി. ബയ്യ(സഹോദരന്‍) എന്നായിരുന്നു അദ്ദേഹത്തെ വിളിക്കാറുണ്ടായിരുന്നത്. അദ്ദേഹത്തെ സഹോദരനായാണ് താന്‍ കണ്ടിരുന്നത്. എന്നാല്‍ അയാളില്‍ നിന്ന് ഇത്തരത്തിലുള്ള ഒരു അതിക്രമം ഒരിക്കല്‍പോലും പ്രതീക്ഷിച്ചതായിരുന്നില്ലെന്നും പെണ്‍കുട്ടി പറയുന്നു. കഴിഞ്ഞ വര്‍ഷം ജൂണില്‍ ഇപ്പോള്‍ അദ്ദേഹം താമസിക്കുന്ന വീട്ടില്‍ പോയിരുന്നു. അദ്ദേഹം ജോലി വാങ്ങിത്തരാമെന്ന് പറഞ്ഞതിനെ തുടര്‍ന്നായിരുന്നു ഒരു ബന്ധുവിനൊപ്പം വീട്ടില്‍ പോയിരുന്നത്.
എന്നാല്‍ അദ്ദേഹത്തിന്റെ പെരുമാറ്റത്തില്‍ ചില അപാകതകള്‍ തോന്നി. ജൂണ്‍ നാലിനായിരുന്നു ഇത്. അദ്ദേഹം മുറിയില്‍ വിളിച്ചു വരുത്തിയാണ് തന്നെ പീഡിപ്പിച്ചത്. ഇക്കാര്യം ആരോടെങ്കിലും പറഞ്ഞാല്‍ പിതാവിനെയും കുടുംബത്തെയും കൊലപ്പെടുത്തുമെന്നും അദ്ദേഹം ഭീഷണിപ്പെടുത്തി.
കുറച്ച് ദിവസങ്ങള്‍ക്കു ശേഷം അദ്ദേഹവുമായി അടുപ്പമുള്ള ചിലര്‍ തന്നെ തട്ടിക്കൊണ്ടുപോകുന്നതുവരെ ഭയം കാരണം ആരോടും വിവരം പറഞ്ഞിരുന്നില്ല. തന്നെ തട്ടിക്കൊണ്ടുപോയവര്‍ കൂട്ടബലാത്സംഗം ചെയ്തു. ഈ സംഘത്തില്‍ നിന്ന് രക്ഷപ്പെട്ട് വന്നതോടെയാണ് വിവരം വെളിപ്പെടുത്തിയതെന്നും പെണ്‍കുട്ടി പറഞ്ഞു.